Hnam/ram dang mite tan kaihhruaina siam

Rulchawm khuaa pawl hrang hrang hruaitute July 28, 2026-a ṭhukhawm chuan an khaw mipui himna atan leh dan bawhchhia an awm loh nan an khuaa hnam dang leh ram dang mite awm dan turah kaihhruaina an siam.

Rúlchàwm khawtlang hruaitute'n kaihhruaina an siamah, "Hnam dang (vai) ILP nei lo leh an ILP felfai loa kan khaw chhunga lo kalte kan man a nih chuan an ILP tihfel hun atan kar khat chhung hun pek ni se," an ti.

ILP nei lo leh ILP felfai lote chu an ILP a fel hma chuan Rs 1,000 an dahkham tur a ni tih sawiin, "Hun tiam chhunga ILP felfai an neih chuan Rs 1,000 an la let leh thei ang a, an dahkhamte hi receipt felfai tak pek ṭhin tur a ni," an ti. "Hnam dang leh ram dang mi tu pawh bazarah an inzawrh leh lak khawm (thirchhe zawn, etc) phalsak an ni," an tih rualin, inah leh khawlaia kal kuala an inzawrh leh lak khawm erawh phal a nih loh thu an tarlang.