Kan sakhaw puithiamte avangin beiseina kan la nei - Home Minister

Chin Peace & Reconciliation Innitiative (CPRI) leh Advocay Group for Peace (AGP) Mizoram chuan August 8, Inrinni zan khan Aijal Club-ah 'Chin Peace Summit, 2026' an buatsaih a; Home minister K Sapdanga'n hmanpuiin, sakhaw puithiamte avangin beiseina an la neih zel thu a sawi.

Home Minister chuan, Pathian thu-ah, 'Remna siamtute chu an eng a thâwl e, Pathian faa vuahin an la awm dawn si a' tih a nih thu sawiin, "Hei hi Lal Isua sermon rawngbawlna hmahruai zinga mi a ni. Kan sakhaw hruaitute báng loa in ṭawngṭai avang leh, thilphal taka in luan chhuah reng avangin harsatna naménlo a thlen pawhin mipui kan dam khawchhuak leh hrâm ṭhin. Kan sakhaw puithiamte avangin beiseina kan la nei zel a ni," a ti.

Mizorama chêng, hmangchang hre chinte chuan Chin area-a mipuite chu mi hrang loa an pawm thu sawiin Sapdanga chuan, "Inen hranna rawngkai boruak lo awm palh zeuh ṭhin pawh hi misual falte pawi khawih vang a ni ṭhin a, YMA leh sorkar an che vat ṭhin. Mi hrang kan ni lo tih min hrilhhretu chu kan history te, kan ṭawng te, kan culture te, kan inlaichinnate hi a ni," a ti a, natna leh hlimna inchhim tawn reng an nih thu a sawi.

Home Minister chuan, Mizoram sorkarin Chin rama unaute harsatna tawh uluk taka a thlir reng thu sawiin, "Sorkar anga kan mawhphurhna piah lamah, laichin unau nihna ang te, Pathian siam mihring kan nihna ang pawhin, a chángin dan hnuaiah, a cháng chuan sawi mâm chawp ngaite pawhin kawng kan lo dap ve ṭhin. Tlawmngai pawl, a bikin Central YMA an thawh hlawk em em a ni," a ti.

Sorkar laipui pawhin a cháng chuan maimitchhing chungin chhawmdawlna hna an thawk tih sawiin K Sapdanga chuan, "Kan chief minister Pu Lalduhoma hian a thawh hlâwk em em a, harsatna tâwktute'n a zar kan zo hle a ni," a ti a; beiseina nei tawh lo, hliam leh mangangte hnêm tura theihtawp chhuaha Pathian hnena ṭawngṭai zel turin kal khawmte a sáwm.

Chin Peace Summit-ah hian AGP chairman R Lalngheta, CPRI chairman Rev. Dr Biak Lian Thang, Chinland Council leh ICNCC/CB hruaitute pawhin thu an sawi a; CYMA Zaipawlin hla an rem a ni.