Thara hoin Chawnpui inlan dawn

Chawnpui FC-in coach thar Laldinthara hoin zanin dar 7:00 hian Mizoram Premier League Season 8-ah Chhinga Veng FC an hmachhawn dawn. An match hnuhnung berah Chawnpui hi Aizawl FC lakah 5-0 a an chak loh avangin coach HC Zarzoliana nen an inṭhen a, season liam ta an coach Thara chungah rinna an nghat nawn.

MPL round 7-ah khan Chawnpui hian Chhinga Veng an hneh a, an boruak a nung thar hle. Chawnpui an rawn 'par' ṭan dawn chauha a lan laiin an elpui bera ngaih Ramhlun North lakah 2-1 in an tlawm zui a, MPL khel zel turin hmabak a hautak ta hle.

Chawnpui coach Thara chuan, "Goal venhim kan thupui ber a ni dawn a, tlarhnung kan rem phui hmasa ang. Match kua aṭangin goal 24 kan chhuah a, ka naute hian hei aia khel ṭha tur hian theihna a nei - point min hlawhchhuahpui ngei ka ring tlat a ni," tiin a player-te chungah rinna a nghah thu a sawi.

Season liam ta khan Chawnpui hi Thara hnuaiah point 15 hmuin paruknaah an awm. Round 9 khelh zawh khan point 11 an hmu - chumi awmzia chu match hnuhnung pangaah point li chiah an hmu tihna a ni a, chu chu tuna an point hmuh zat a la ni chauh avangin hmabak a la thui hle.

Chhinga Veng coach Anand Gurung chuan, "Chawnpui chiah hi kan hneh loh awmchhun an ni a, hneh let ngei kan tum," tiin Vanglani a hrilh. Chhingcows hian BSS Sporting, Kolkata aṭangin goalkeeper Dharminder Guru an lalut a, zanin hian Punjabi keeper hi a inlan nghal rin a ni.