Adhoc aided M/S zirtirtute'n mass casual leave an la ṭan

Mizoram Government Adhoc Aided Middle School Teachers' Association (MIGAMSTA) chuan chawlhkar khat chhung badge dum bela an thil phûtte tihlawhtling tura sorkar an nawr hnuah, thu lawmawm an dawn loh avangin nimin aṭang khan a huhoin chawlh (mass casual leave) an la.

MIGAMSTA chuan thuchhuah siamin, sorkara an phût a hlawhtlin theih nan August 3-7, 2026 chhung badge dum belin sikul an kai thu an tarlang a, "Sorkar aṭanga thu lawmawm kan la dawn loh avangin August 10-12, 2026 chhung loh theih lohna avangin mass casual leave kan lak a ngai ta a ni," an ti.

Sorkara an phûtte August 12, 2026 ral hmaa tihhlawhtlin a nih loh chuan na zawka hma an lak dawn thu tarlangin MIGAMSTA chuan, an harsatnate sorkarin sutkiansak ngei se an duh thu an tarlang.

MIGAMSTA-ah hian Mizorama middle school 44 aṭangin zirtirtu 270 an tel a; MNF sorkarin kum 2023-a a provincialise tawh angin, sikul 44-te chu provincialise leh vek turin sorkar an phût a ni.