KHAWTHLIR

Electoral roll târ chhuah hun sawn

Election Commission of India (ECI) chuan Mizorama Electoral Roll Special Intensive Revision (SIR) 2026 final electoral roll tar chhuah hun chu September 7, 2026-ah a sawn. SIR 2026 final electoral roll tihchhuah ni atan September 6 ruat a ni a, Pathianni a nih avangin Mizoram Chief Electoral Officer chuan sawn turin ECI-ah dilna a thlen a ni.

Kawng khâr dawn

Aizawl bawrhsap Lalhriatpuia chuan hriattirna tichhuakin, Kulikawn Ngaizel phei kawng chhak lam kote chu vawiinah tuam (draping) chhunzawm a nih dawn thu a tarlang. Hna thawh chhung, chawhma dar 10 aṭanga tlai dar 4 thleng Ngaizel kawngah lirthei tlan phal a ni lo a, Nghakliana Filling Station pawh khâr tur a nih thu a tarlang bawk.

Kawngzawha tel turin ZPM inchah

ZPM party chuan, Foreign Contribution (Regulation) Act Amendment Bill 2026 dodalna lantirna atana Council of Churches in Mizoram-in vawiina kawngzawh an huaihawt tur chu an thlàwp thu an tarlang a; an party mite chu an remchan anga kawngzawhnaah hian tel turin an chah.

Project thlirho

Champhai bawrhsap Mohammad Aaquib hoin nimin khan DC conference hall-ah District Planning Committee chuan district transformation programme hnuaia project panga - Project Sunsilk, Project Greenshield, Project Rise, Project Lead leh Grievance Redressal Application-a hmalakna awm tawhte an thlirho a, project thar pathum an pawm bawk a ni.

VB-GRAMG zirho

Nimin khan Diakkawn YMA Hall-ah VC member-te pualin VB-GRAMG hnuaia hmalakna turte leh a kalhmangte zirhona buatsaih a ni a, Kolasib DRDO project director Lalmuan Puia'n a hawng. Village/Gram Panchayat Plan (VGPP) siam dan te, job card/guarantee sem dan te, tui humhalh leh khawtlang tana hmasawnna ruhrel din dante zirho a ni.