Rúlhût hlo pêk beihpui thlak a ni

Nimin khan Mizoram pumah rûlhût hlo pêk beihpui thlak a ni a, National Deworming Day 2026 Second Round-ah hian naupang ṭhahnem tak hnenah rûlhût hlo (Albendazole) eitir an ni. Deworming Day hi kum khatah vawi hnih - February thla leh August thlaah hman a ni ṭhin.

National Deworming Day-ah hian sorkar sikul, mimal sikul leh anganwadi centre-ah te naupangte hnenah rûlhût hlo pek vek tum a ni a; sikul kai lote chu accredited social health activist (ASHA)-te'n an inah kal chilhin an pe a ni. Nimina pek hman lohte chu August 17, 2026-ah pek an ni ang.

National Deworming Day August Round 2026 hi Aizawlah chuan Aizawl East Chief Medical Officer pisa huaihawtin Neuhof English Medium School-ah hman niin, bialtu AMC corporator Dr Lallawmkimi Tochhawng-in a hawng.

Dr Lallawmkimi Tochhawng chuan, sorkar laipui hmalakna hrang hrang Mizoram mipuiin an hman ṭangkai theih nan inhrilh tam a ṭul thu sawiin, National Deworming Day pawh mipui tana hriselna lama sorkar laipui hmalakna pawimawh tak a nih thu leh, Day hmang hian kum 1-19 inkarte'n rûlhût hlo ei vek se a duh thu a sawi.

Inkhawm hi Aizawl East CMO Dr Lalhlunpuii'n a kaihruai a, rûlhût hlo ei pawimawhna leh department dangte nen thawhhona ṭha neih a pawimawh dan a sawi a; Lalnuntluangi'n Deworming Day pawimawhna leh rûlhût hlo ei dan dik a sawifiah bawk.

Lungleiah chuan Bazar High Schoolah hun hman a ni a, Lunglei SDC Deepak Godara-a'n a hmanpui. NDD 2026 Second Round-ah hian Lunglei district chhungah kum 1-19 inkar rûlhût hlo pek tur mi 44,205 an awma ngaih a ni.

Saitualah chuan Saitual Middle School II-ah hman a ni a, district education officer Laldingliana'n a hawng. Zirlai eng emaw zat hnenah rûlhût hlo pek a nih bakah, Saitual Health & Wellness Centre-a thawkte'n kut sil dan an zirtir a ni.

Khawzawlah chuan Chief Medical Officer pisa huaihawtin Little Learner School-ah National Deworming Day hman a ni a, additional DC K Zorammuana'n a hmanpui.