Food Testing Laboratory dinna tur enfiah

Health minister Lalrinpuii leh Commerce and Industries minister F Rodingliana te chuan August 8, Inrinni zing khan Mission Veng Market Building an tlawh a; Food Testing Laboratory puitling dinna atan a remchan leh remchan loh an enfiah.

Mizoramin Food Testing Laboratory a neih mek, Central Medical Store (CMS) building, Zemabawka mi chu a hmunhmain a tlin loh avangin NABL accreditation a tling pha lo a, Mizoram mamawh a phuhrûk loh avangin Assam laboratory-ah thil pawimawh endik tur thawn a ngai fo ṭhin. Hei vang hian CMS sawnna atan Mission Veng Market Building a remchan leh remchan loh enfiah a ni.

Food Testing Laboratory lian leh changtlung zawk din a nih theih nan Health minister Lalrinpuii chuan Food Safety and Standards Authority of India (FSSAI) a dâwr a; FSSAI chuan Food Testing Laboratory puitling (full fledge NADL accredited level) din phalsakin, a dinna tur sum leh pai, bungrua leh khawl bun te, thawktu thlengin a tum thei dawn. Laboratory dinna tur hmun erawh state sorkarin a ngaihtuah a ṭul thung.

Food Testing Laboratory dinna tur remchang an enfiahnaah hian minister pahnih hi Health department leh Commerce & Industries department hotute leh Mission Veng Local Council member-te'n an ṭawiawm a ni.

Mission Veng Market Building hi State Food Testing Laboratory (NADL accredited) dinna atan a tlin leh tlin loh endik turin FSSAI hotute chuan August 12, 2026 hian Mizoram an rawn thleng dawn niin an sawi.