Addiction Free Society Campaign hman a ni

Governor Gen. Dr Vijay Kumar Singh chuan nimin khan St. Paul's Higher Secondary School-ah Nasha Mukh Bharat Abhiyan & Mission SPANDAN hnuaia Brahma Kumaris buatsaih, ruihhlo laka fihlim khawtlang siam tura hmalakna 'Addiction Free Society Campaign' a hmanpui a; ruihhlo laka fihlim turin taksa leh rilru hriselna, taksa sawizawi leh rilru sawrbingna ngai pawimawh turin zirlaite a chah.

Gen. Vijay Kumar Singh chuan, zirlaite chu ruihhlo laka fihlim tum tlat tur leh thlêmna an tawh pawha hnawl ngam tur te, hmakhaw êng tak an neih chu ruihhlo avanga chhiattir phal lo turtein a fuih a, "Nu leh pa leh zirtirtute ṭhahnemngaihna leh beiseina tihlawhtlingtu nih tum tlat ula, hmabak êng tak in neih avangin in chungah beiseina sang tak kan nei," a ti a; ruihhlo ṭhat lohzia hria a, mi dangte zirtirtu an ni thei a ni tih hria a, entawn tlaka nun tum turin a fuih.

Ruihhlo chi hrang hrangte chu ngaihven ngai tak, mite chawk buaitu a nih thu sawiin Larsap chuan, "Ruihhlo ngawl vei awm lohna khawtlang kan siam theih phawt chuan danglamna nasa tak a thlen dawn," a ti.

Governor chuan, India ram chu ṭhalai tamna a nih thu sawiin, "Nakin lawka India innghahna ni mai tur ṭhalaite hi ruihhlo bawiha an luh mai loh nan leh hrisel leh hna thawh tlak an nih theih nana kaihhruai an ṭul," a ti a; Mizoram chu ramri depa awm a nih avangin ruihhlo a hluar phah thu a sawi.

Inkhawmah hian St Paul's HSS principal Brother Kuriyan MS-in kal khawmte lawmna thu a sawi a; Dr Sachin Parab kaihhruaiin zirlaite'n ruihhlo ti lo turin thu an tiam a ni.