Lungleiah World's Indigenous Peoples Day

Zo Reunification Organisation (ZORO) Southern Zone chuan nimin khan Lunglei Convention Centre-ah International Day of the World's Indigenous Peoples vawi 32-na an hmang a, adviser to chief minister Lalmuanpuia Punte, MLA leh leh Lunglei South bialtu MLA Lalramliana Papuia ten an hmanpui.

Inkhawm hi ZORO Southern Zone president Sailothanga Sailo-in a kaihruai a; Lalmuanpuia Punte chuan, Zo hnahthlakte rilruah Zo tihin hmun lian tak a luah thu sawiin, "Tuna Mizorama awm mekte hi sapho lo chhuah hlim khan chhim lam (Lunglei lam) leh hmar lam (Aizawl lam) te Bengal leh Assam aṭangin min awp a, mahse, mi thuhmun, thlah khat, unau kan ni tih min hriat hnuin administration khatah min dah a ni," a ti.

Lalmuanpuia Punte chuan, tuna Bangladesh, Burma leh Manipur lama Zo hnahthlakte nen hmun khata British sorkarin a dah hmain an chhuak tih sawiin, "Chuvanga vawiin thleng hetianga ṭhen darh hi kan ni a, Zo fate hi ram hrang hranga awm darh ni loin, kan awmna min ṭhen darh zawk a ni," a ti a; ṭhen hran ni mah se, Zo unau vek an ni tih inhriat thar a ṭul thu a sawi.

Khualzahawm Lalramliana Papuia pawhin thu sawiin, ZORO hmalakna ropui a tih thu a sawi a, "Hnam anga kan lungrual tlanna hmun tur, political party hrang hrangte pawhin kan ngaihdan leh duh dan hrangte dahṭha a, ZORO thil tihah chuan hnam tan a ni tih hria a, rilru thuhmun nen a luang khawm tur kan ni," a ti.

International Day of the World's Indigenous Peoples hi August 9 a ni a, kuminah Pathianni a nih avangin nimin khan Lungleiah hman a ni.