Tlangsamah tuizem chhunga oxygen tlâkchham vangin mi pahnih an thi

Champhai Tlangsamah nimin khan tuizem (tanky) siamnaah oxygen tlâkchham vangin Vanlalpeka (33) s/o Roluna, Chalrang leh Lalengmawia (39) s/o Tlangthankhuma, Tlangsam an thi.

Tlangsam aṭanga thu dawn danin, Tlangsam Dinthar Venga F Hrangmawii in sak meka lei chhunga tuizem (tanky) tur siamah Vanlalpeka leh Vannunmawia (52) ten hna an thawk a; tuizem hi ft 6 vela thûk niin, tui ft. 2 vela sang a tling a, khuh phui niin, luhna tur kua ft. 2 bial vela zau a awm.

Tuizém chhunga hna thawk pahnih - Vanlalpeka leh Vannunmawia (52) te chuan boruak (oxygen) a tlem avangin harsatna an tâwk a, an mangang chu an au chhuak a ni. F Hrangmawii'n a rawih ve tho, an bul hnaia awm Lalengmawia leh Lalhmingthanga te an tlan nghal a, tuizem chhungah an lut ve nghal a ni.

An chhak lama hna thawka awm mipa pangate'n an hriat veleh an pui ve nghal a, tuizem chhunga awmte chu an la chhuak a; tuizema hna thawka pakhat zawk Vanlalpeka leh anmahni ṭanpui tura lut Lalengmawia te chu damdawi-in panpui ni mah se, chhan hman an ni lo.

Tuizem chhunga hna thawk pakhat zawk Van-nunmawia chu MED-AIM Hospital-ah hruai niin, oxygen pek nghal a ni a; ṭanpui tura kal hmasa pahnih zinga pakhat zawk Lalhmingthanga pawh Health sub-centre-ah hruai a ni bawk.

Vanlalpeka hian Champhai Tlangsam mi nupuiah neiin, Tlangsamah hian a khawsa tam a, a ruang erawh an khua Chalrangah lak a ni. An pahnih hian vawiinah vui an ni ang.