Sazâ kâpa puh jail-ah dah luh a ni

Nungcha humhalhna dan (Wildlife Protection Act, 1972) bawhchhiaa saza kapa puh RT Thanga (41), Kawnpui Hmarveng, Kolasib district chu Kolasib District Court thu angin nimin khan District Jail-ah dah luh a ni.

Kolasib DFO PC Lalṭanpuia tarlan danin, RT Thanga hi Mizoram state animal Saza (Capricornis rubidus) kâp a, a sa leh a lu kawlah puh a nih avangin nimin khan Kawnpuia Forest Range Officer hmalaknain man a ni a; nimin khan Kolasib District Court-ah hruai nghal niin, Court thu angin District Jail-ah dah luh a ni.

RT Thanga hnen aṭang hian saza kahna silai (12 Bore SBBL) leh saza sa, deep freezer chhunga dah kg 10.5, a kawchhung (a chek) chhum hmin sa leh a lu (trophy) man a ni a; chungte chu Kolasib Judicial Magistrate first class thupekin nimin khan Kolasib district honorary wildlife Warden H Vanlalnghaka hoin leiah phum a ni.

Kolasib DFO chuan, saza chu Wildlife Protection Act, 1972-ah venhimna sang ber (Schedule-I) hnuaia awm a nih thu a tarlang a, "Tihhlum, a sa ei leh lei/hralh bakah, tihhlum tuma veh/pêl te hi khap tlat a ni a, hetiang ti lui man chhuahte chu thiam loh chantir an nih chuan kum 3-7 chhung tàn leh Rs 25,000 aia tlem lo chawitira hrem tur a ni," a ti.