FCSCA Minister leh IOC hotuin Mizorama oil depot din chungchang an sawi dun

Food, Civil Supplies & Consumer Affairs (FCSCA) minister BLalchhanzova leh India hmarchhaka Indian Oil Corporation (IOC) executive director Nitin Bhatnagar chu nimin khan minister pisaah an inkâwm a, Mizorama oil depot (tuialhthei chhêk khawlna) din chungchang an sawi dun.

B Lalchhanzova chuan, Mizorama oil depot bun a nih theihna tura hmalakna kal mek leh hmasawnna awm tawh te, hmalak zelna turte Nitin Bhatnagar a sawipui a, "Khuarel chhiatna thleng thei te, ṭhenawm state-a buaina thleng palh emaw, chhiatna thleng thulhah, tuialhthei lak luh a harsat ṭhin avangin Mizoramin oil depot kan mamawh tak zet a ni," a ti.

Mizoram sorkarin oil depot siamna tur hmun eng emaw zat a enfiah tawh thu leh, chungte chu IOC lam pawhin an endik tawh thu sawiin Minister chuan, "A theih dan awm apiang ûm zuiin Mizoramin oil depot a neih ngei theih nan theihtawp kan chhuah zel dawn," a ti a; oil depot siam nan ram a thlawna IOC hnena pek tur a awm tur thu Bhatnagar a hrilh.

Supply Minister chuan, Prime Minister-in Mizoram a rawn tlawh hunah tuialhthei chhêk khawlna siam chungchang lo sawi leh ngei a tum thu a sawi bawk.

Nitin Bhatnagar chuan, IOC-in Mizoramah oil depot din ngei an duh a, Mizoram sorkara FCSCA department nen an indawrnain hma a sawn zel thu a sawi a; Chief Minister leh FCSCA Minister ten ṭhahnem an ngaihna chuan rah ṭha a chhuah ngei a beisei thu sawiin, "Company lam leh Ministry of Petroleum and Natural Gas hnenah pawh kan theih ang angin hma kan la mek a ni," a ti.

Inkawmnaah hian FCSCA Minister hi FCSCA additional secretary Dr H Andrew Vanlaldika'n a ṭawiawm a, IOC deputy nanager Z Lungdim pawh a tel a ni.