Minister-in Khawzawla hmunhma a tlawh

Urban Development & Poverty Alleviation (UDPA) minister K Sapdanga chuan nimin khan Khawzawl district-a UDPA department hnuaia hnathawh leh hmalakna te a tlawh.

K Sapdanga hian Khawzawla UDPA department pisa tlawhin, thawktute nen an inkâwm a, self help group (SHG)-te thil siam leh thar chhuahte zawrhna tura siam 'Gram Dukan' a tlawh a ni.

Khawzawl Zuchhip Multipurpose Community Hall leh Vengthar Auditorium sak mekte Minister chuan a hmunah a enfiah a; chak zawk leh ṭha zawka hna thawh theih dan tur officer-te leh engineer-te a sawipui.

Zuchhip Multipurpose Community Hall sakna atan SASCI sum Rs 4,41,08,284 ruahman niin, May 1, 2023-ah sak ṭan a ni a, kuminah sak zawh tum a ni. Vengthar Auditorium sakna atan state sorkar sum Rs 6,42,92,565 ruahman a ni a, August 16, 2023-ah sak ṭan a ni.

Minister K Sapdanga hi Mizoram Police DIG C Lalnunmawia, Khawzawl bawrhsap K Vanlalṭhiana leh SP F Lalbiakzauva, UDPA officer Chandrakant Bagoria leh executive engineer C Malsawma bakah, official dangte'n an ṭawiawm a ni.