KHAWTHLIR

SGPB ṭhukhawm

State Geological Programming Board (SGPB) chu nimin khan an chairman Dr H Lianzela, Commerce & Industries, Geology & Mining secretary ni bawk kaihhruaiin an ṭhukhawm. Annual Report of Directorate of Geology & Mining (DGM), Mizoram 2025-26 leh Citizen’s Charter during 2025-26 tlangzarh a ni.

Pangang khawi zir

Sericulture department hnuaia Mamit District Transformation Programme chuan August 11, Thawhlehni khan Bána Kaih (Handholding) hnuaia Darlung khuaa pangang khawia eizawng mi 10-te tan pangang khaw leh enkawl dan zirna an buatsaih. Mamita Sericulture officer Lalbiakhlua Ralte-in thil pawimawhte a zirtir a; thingtheihmu pangang khawitute hnenah Ankush (disinfectant) sem nghal a ni.

Bawlhhlawh thliar danah mipui ngen

Siaha bawrhsap VL Hruaizela Khiangte kaihhruaiin nimin khan District Solid Waste Management Committee an ṭhukhawm. Siahaa Solid Waste Management Centre sak mek chu 60% zawh a nih tawh thu leh, hman khat daih sarâng (single use plastic) tihrêmna atan mipui aṭangin plastic ûm kg khat Rs 30 zela lei ṭhin a nih thu tarlan a ni. Bawlhhlawh chi lia thliar kawngah theihtawp chhuah turin mipui an ngen bawk.

VB-GRAMG zirtir

Nimin khan Serchhip district-a village council tin aiawhte leh field staff-te pualin VB-GRAMG zirhona, Paanch Sammelan buatsaih a ni a a, Serchhip bawhsap Paul L Khuma'n a hmanpui. ARDO Stephen Laltlansanga Auhmun-in VB-GRAMG kalpui dan tura hriat tur pawimawhte a lem nen a sawifiah a ni.

Rakzu man

Bawngkawn police-te chuan August 11, Thawhlehni tlai khan Bawngkawn PS bulah 407 truck pakhat aṭangin rakzu litre 740 an man a, truck khalhtu C Zomuanpuia pawh an man nghal. Rakzu hi satha ip 18-ah dah a ni a, thubuai ziah luh a ni.