Khumtung-Keiṭum kawng siam endik; Lung ṭha lo truck phur 5 an paihtir
District-a sorkar thuneitute leh MJA, Serchhip District member-te chuan nimin khan NHIDCL hnuaia Shivalaya Construction leh KRAM Infracon ten Khumtung leh Keiṭum inkar National Highway 54 thawm ṭhat mek an enfiah a; kawng thawm ṭhatna atana hman quarry lung ni lo, lung ṭha lo truck phur nga an paihtir.
Kawng endiktute hian Shivalaya Construction-in Khumtung dai aṭanga Baktawng Chân In thlen hma, thleng kawng an thawm ṭhat chu a ṭha thawkhata an hriat laiin, Baktawng Mualkawi dái aṭanga Keiṭum inkar thawm ṭhatu KRAM Infracon hnathawh erawh a muan bakah, duhthu a sâm lo hleah an ngai. Kawng thawm ṭhatna atana lung an hman, hmun pangaa an chhêk khawl sa chu lung ṭha lo, quarry lung a nih loh avangin an paihtir nghal a ni.
Kawng endiknaah hian sorkar official-te chu Serchhip SDC Chawngthu Lalrinhlua'n a ho a, MJA aṭangin president Kapliana Pachuau leh member dangte an tel. Mizorama NH enkawltu NHIDCL aṭangin eesident engineer Ram Niranjan Parsad leh field engineer Jiten Raut te an tel a, Kram Infracon aṭangin public relation officer Lalhruaitluanga te an tel bawk.
Serchhip districta NH-54 Phase-1 Khumtung-Baktawng Mualkawi inkar km 5 chhunga hna thawktu Shivalaya Construction hnathawh a ṭha thawkhatah an ngai. Kawng an siam zinga 5% vel chiah kumin fûrah thawm ṭhat ngai awmin, chungte chu ṭha takin an thawm a, an zo thawkhat tawh.
Phase-II Baktawng Mualkawi-Keiṭum via Serchhip Bypass Road inkar kawng siamtu KRAM Infracon hna erawh a chhe hleah an ngai. An kawng siam sa zinga 80% aia tam mah chu kumin fûrah thawm ṭhat ngaiin a chhia a, lung an hmante a ṭhat tâwk loh vangah an ngai a ni.
Phase-III Keiṭum leh Bungtlang inkara hna thawktu Bhartia Infra Projects hnathawh erawh a ṭha a, sawisel tur leh thawm ṭhat ngai a awm loh thu Serchhip MJA hruaitute chuan an sawi.
KRAM Infracon hi August 7, 2026 khan NHIDCL-in an lo vaukhàn tawh a, ni 15 chhung (August 22, 2026) ral hma)-a lirthei kal theiha kawng chhia thawm ṭha zo vek turin an hriattir a ni. Serchhip Bawrhsap pawhin KRAM Infracon chu a ṭul dan azira legal action lakah a lo vaukhàn tawh bawk.