BJP-in Tiranga Yatra an huaihawt

BJP, Mizoram Pradesh chuan Har Ghar Tiranga pualin nimin khan 'Tiranga Yatra' (Two Wheeler Rally) Aizawlah an buatsaih a, Mizoram BJP president Dr K Beichhua'n Sikulpuikawn aṭangin a vailiam.

Tiranga Yatra-ah hian mi eng emaw zat two wheeler hmanga tlanin, Sikulpuikawn aṭangin Zarkawt an pan a, Zarkawt traffic point-ah kualin, Mizoram BJP pisa, Upper Republic-ah an lut khawm a ni.

Yatra kharna inkhawmah Dr K Beichhua chuan, India ram hmun hrang hrangah Har Ghar Tiranga campaign buatsaih ṭhin a nih thu a sawi a, "Vawiina India flag târ chunga kawngzawh kan neih hian flag kan tár satliah mai a ni lo a, flag kan tàr hian India ramin zalenna kan neih theihna tura beitute kan hriat reng nan leh kan zahna kan lantirna a ni a, ram pum inpumkhatna, ram hmangaihna leh national flag zahawmna kan lantirna a ni," a ti.

Mizoram BJP President chuan, tun hma chuan national flag chu hun leh hmun bikah chauh tàr phal a ni ṭhin thu sawiin, "Tunah chuan in tinah tàr phal a ni ta. National hruaitute'n India flag zahawmna leh ngaihhlutna mipui thinlunga tuh zel an duh angin, vawiinah chuan India flag leh India ram zahna a ṭhang nasa hle tawh a, ram pum inpumkhatna a tihchak phah hle bawk," a ti a; India mi nihna chu ngaihlut tur a nih thu a sawi bawk.