Pension Payment Order sorkara pek let chungchang Kolasib leh Saitualah inzirtir

Nimin khan Kolasib-a Parish Hall-ah leh Saitual College auditorium-ah district ve vea Treasury Office-te'n dan loa family pension lak chungchang inzirtirna, ‘Sensitisation programme on voluntary surrender of Pension Payment Order’ an buatsaih.

Kolasib-a inzirtirna hi treasury officer Lalremruati'n a kaihruai a, district bawrhsap H Dolianbuaia'n a hmanpui. Accounts officer Lalmangaihi'n Kolasib district dinhmun tlangpui a sawi a, resource person R Lallawta'n dan loa family pension late'n Pension Payment Order an pek let dan tur a sawifiah.

Saitualah chuan inzirtirna inkhawm hi treasury officer Joseph Lalzuitluanga’n a kaihruai a; accounts officer Julie Lalhlunpuii Pachuau-in Drawing and Disbursing Officer (DDO), khawtlang leh kohhran hruaitute mawphurhna leh hriat turte a sawifiah. Resource person assistant accounts officer C Lalduhawmi'n pamily pension lak theih dan, lak theih zat leh la thei lote chungchang a sawifiah thung.

Saitual Treasury Officer sawi danin, Saitual district-ah pension la mi 505 an awm a, chung zinga mi 196 chu family pension la an ni.

Dan loa family pension late tan an duh thu ngeia inpek (surrender)-na hun sorkarin a hawng mek a, September 30, 2026 thleng hun hawn a ni dawn. Hun tiam chhunga inpete chu sorkarin ngaidamin, dan loa pension an lo lak tawhte a rulhtir dawn lo a, inpe lo a, dan loa family pension la zui zelte erawh chu chhui chhuah a, hrem tum a ni.