Zirtiri RSC-in Freshers Social an hmang; Harsatna karah tumruh turin zirlaite fuih

Zirtiri Residential Science College chuan nimin khan Vanapa Hall-ah 'Freshers' Social cum Felicitation Programme' an hmang a; minister PC Vanlalruata'n hmanpuiin, zirlaite chu harsatna karah pawh tumruhna leh tih tak takna nen hlawhtlin tuma bei turin a fuih.

PC Vanlalruata chuan, high school a luh lai aṭang tawhin politics lam a ngaihtuah ṭan thu sawiin, politics a luh aṭanga kum 25 hnuah MLA atan thlan tlin a nih thu a sawi a, "Beidawn cháng ka nei fo chungin tum ruhna nen hma lam ka pan zel a ni. Tuna zirlaite pawh hian harsatna karah tumruhna leh tih tak takna nun nen hlawhtling tura in beih zel a ṭul," a ti.

Cooperative movement-ah inhmang tura zirlaite sáwmin Minister chuan, "Mahnia kan tih theih loh hi a huho chuan a lo awlsam zawk ṭhin a, heti lamah hian ṭan lak thiam a pawimawh," a ti a; Zirtiri RSC-in auditorium an mamawh chu sak a nih theih nan PWD Engineer-in-Chief nen theihtawp an lo chhuah tur thu a sawi.

Inkhawmah hian Minister hian zirlai ti ṭha zualte hnenah NCC Award leh Lalziki Sailo Award a hlan a, college annual magazine 'Senhri' a tlangzarh bawk.

Khualzahawm PWD E-in-C David Sapzova pawhin thu a sawi a; Dr Kapṭhuama Incentive Cash Award, Dunglena Award leh Dr John Malsawma Award te zirlai ti ṭhate hnenah a hlan a, College hotute hnenah Rs 1,00,000 a pe bawk a ni.

Zirtiri RSC principal Dr Zirlianngura tarlan danin, Zirtiri RSC hi NAAC 'A' grade nei a nih bakah, Mizoram sorkar enkawl college zinga NIRF Ranking nei awm chhun a ni a, kuminah zirlai lut thar 298 an nei. Principal hian classroom leh a vel vawn faia ti ṭhate hnenah lawmman a hlan a ni.