CM-in Mizo H/S Field chei ṭhat a hawng; Sorkar hmasa bul ṭan, hmalakna ṭha a ni - CM

Mizo High Sikul Field chei ṭhat chu nimin khan chief minister Lalduhoma'n a hawng a; khelmual chei ṭhat chu sorkar hmasa bul ṭan, hmalakna ṭha tak a nih avanga lawm taka an chhunzawm a nih thu a sawi.

Khelmual hi Aizawl Smart City Limitedin cheng vbc 16.06 sênga an siam a ni a, phûllem phah a ni. A sei zawng meter 73.35 leh a zau zawng meter 33.12 a ni a, mi 310 ṭhut theihna gallery siam a ni bawk.

Chief Minister chuan, Mizo High Sikul Field chei ṭhat project chu sorkar hmasate bul ṭan a nih thu sawiin, "Hmalakna ṭha tak an lo kalpui avangin keini pawhin lawm takin kan chhunzawm a, vawiinah kan hawng thei ta a, an chungah lawmthu kan sawi a ni. A tirah project hming dang an lo vuah a, mahse, kum tam tak Mizo High Sikul Field kan lo tih tawh, infiammi tam takte lo chher chhuak tawh kha a hming han thlak atan chuan a uiawm lutukin kan hria a, Mizo High Sikul Field tiin kan thlak leh a ni," a ti.

Mizo H/S Field enkawl zuitu tur Management Committee-ah sorkar aiawh bakah, Zarkawt Local Council, tlawmngai pawl leh Mizo High School Principal te an awm dawn tih sawiin CM chuan, "Mizo H/S leh HSS te chuan man chawi loin an duh hun hunah an hmang thei dawn a, Zarkawt LC leh NGO te, Zarkawt Presbyterian Kohhran ten a thlâwnin an hmang thei bawk ang," a ti a; parking chu Zarkawt LC-in an enkawl dawn thu a sawi.

Lalduhoma chuan, Assam Rifles chhuahsan tawh Zarkawt YMA Hall bula ram chu lèn khawthawnna hmun atan siam mek a nih thu sawiin, "Hna kan thawk ṭeuh tawh a, Zarkawt hian hetiang lam chi centre dang hi in nei leh thuai dawn," a ti. Mizo H/S Field chei ṭhatna project kalpuitu UDPA Minister leh a thawhpui te, Aizawl Smart City Ltd-a thawkte chungah a lawm thu a sawi bawk.

Khualzahawm UDPA minister K Sapdanga chuan, bialtu MLA a nih angin a bial chhunga ruhrel thar ṭha tak an nei chu a lawm thu a sawi a, "Hetiang project dang hi Mizoramah kan nei lo. Field hi kum tam tak chhung chu Aizawla football zirna langsar ber a ni ṭhin a, tournament khelhna tham tling lo mah se, inzirna hmun ṭha a nia, tun hma aia ṭangkai zawkin ṭhalaite'n an hman kan beisei," a ti.

K Sapdanga chuan, Mizo H/S Field thar chu Mizo engineer-te kutchhuak a nih avangin chhuanawm a tih thu a sawi a; Aizawl khawpui mamawh - lirthei dahna zau tak a keng tel chuan a tihhlut zual thu a sawi bawk.

Mizo H/S Field chei thar hnuai lamah lirthei dahna chhâwng hnih a awm a, lirthei ke pali nei 80 leh ke hnih nei 47 dah theihna tura siam a ni. Contractor chu Lushai Engineer niin, June 10, 2022-ah contract agreement ziah a ni a; February 4, 2023-ah hna ṭan niin, August 10, 2026-ah zawh a ni.