KHAWTHLIR

Librarian's Day

Synod Hospital College of Nursing chuan August 12, Nilaini khan an hall-ah National Librarian's Day an hmang. Librarian's Day hmanna inkhawmah hian resource person Dr S Lalnunpuia, T Romana College librarian-in Day thupui, 'Libraries: Connecting People, Preserving Knowledge, Empowering the Future' tih a sawi. National Librarian's Day hi Father of Library Science an tih Dr SR Ranganathan pian champha August 12-ah hman ṭhin a ni.

Heroin man

Excise & Narcotics department leh Hnahthial YMA Sub-Headquarters Kumpuan Committee leh New Ngharchhip Branch YMA te chuan August 12, Nilaini tlai dar 4 khan New Ngharchhip khaw daiah MC Lalhuzauva (36), Tarpho leh Vanlalpeka (33), Khawhri te hnen aṭangin heroin gram 120 an man. Heroin hi Myanmar aṭanga lak luh a ni a, tihral an tum mek laiin an man a ni.

Lawmthu sawina pe

Mizoram Merchant Association (MIMA) office bearer-te chuan nimin khan Bawngkawn Local Council pisa an tlawh a, Bawngkawn huam chhunga dan loa hnam dang dawrkaite leh Mizo hming hawha dawr neite tihtawp tuma hma an lakna an thlawp thu an hrilh. MIMA hian lawmthu sawi nan Bawngkawn LC hnenah Rs 10,000 an hlan a ni.

Minister-in enfiah

Minister of state Lalnghing-lova Hmar chuan nimin khan a bial, Aizawl West-II chhunga Vaivakawn Bazar sak mek leh Chawnpuia PM EKTA Mall sak mek panna Vaivakawn - Kanan Veng - Chawnpui kawng zauh tura ruahman mek a hmunah a en. Ministrer hi PWD, AMC Ward-XIII hotute leh khawtlang hruaitute'n an ṭawiawm a ni.

My Silk, My Pride

Central Silk Board leh Sericulture department chuan August 12-13, 2026 chhung khan Aizawl district-a khaw pali - Sesawng, Ratu, Ṭinghmun leh Sawlengah te 'Mera Resham, Mera Abhimaan (My Silk, My Pride) 2.0 Campaign an buatsaih. Central Silk Board, Aizawl scientist-D Dr Lalthlamuana Pachuau leh Aizawl district sericulture officer Hmingthantluangi ten pangang khawitute hun an hmanpui a ni.

VB-GRAMG zirho

Mamit leh Khawzawlah nimin khan Panch Sammelans buatsaih a ni a; sorkar hotute leh khawtlang hruaitute an tel a, ni 125 inhlawhna, Viksit Bharat -Guarantee for Rozgar and Ajeevika Mission (VB-GRAMG) Act, 2025 chungchang zirho a ni.

Sangha khawi zir

KVK, Khawzawl chuan nimin khan an training hall-ah sangha khawitute tan sangha dil enkawl dan leh sangha khawi dan zirhona an buatsaih. Zirhona hi Khawzawl KVK senior scientist & head Dr Malsawmkimi'n a kaihruai a, Khawzawl, Kawlkulh, Rabung, Ngaizawl leh Tualpui khuaa sangha khawitute an tel a ni.