MPSC enfiahtu tur Committee din

Mizoram sorkar chuan August 12, Nilaini khan Mizoram Public Service Commission-in sorkar hnathawk tur lakna a kalpui dan enfiahtu tur Committee a din; hei vang hian MZP chuan MPSCa thawkte pisa kai tur an dan an titawp nghal.

DPAR (GSW) chuan August 12, 2026 khan Committee dinna thupek (order) a tichhuak a; chairman atan DPAR Secretary ruat niin, member secretary atan DPAR (GSW) Joint Secretary ruat a ni. Member atan MPSC Secretary, Law & Judicial additional secretary Zahmingthanga Ralte, GAD additional secretary Dr Irene Zohlimpuii Chongthu, Home additional secretary Dr Andrew H Vanlaldika leh Finance additional secretary Lalhmingmawia Sailo te ruat an ni.

Committee-in a tih tur tarlan zingah, MPSC-in dan leh kaihhruaina a hman mek te, sorkar hnathawk tur lakna a kalpui mek dan te, exam buatsaih dan te, hna diltiute'n harsatna an tawh chungchangte leh thil dang chi hrang hrang a tel. Committee hi thla hnih chhungin sorkarah report thehlut tura tih a ni.

MZP chuan thuchhuah siamin, Committee Chairman-in MZP leh aspirant-te chu an lungawi lohna zawng zawng leh MPSC-a siamṭhat ngaite ziaka Committee-ah thehlut tura a sawm angin thehluh a ni dawn tih tarlangin, "Kan thehluh point hrang hrangte chu he Committee-in thla hnih chhungin zirchiangin, recommendation a siam dawn. Chungte pawh chu kan vilzui zel dawn a ni," an ti.

Committee-ah hian beiseina sang tak an nei tih tarlangin MZP chuan, "Committee-in min mamawhna apiangah chet chhuah kan inpeih reng. Candidate-te harsatna tawh mek chungchanga Chief Secretary-in One Time Registration (OTR) bikah helpline siam a nih tur thu alo sawi tawh chu lawmawm kan ti," aan ti a, meeting-a DPAR Secretary-in a sawi chhuah ang ngeia applicant-ten OTR-a harsatna an neih zawng zawngah ṭanpui ngei tura an phut thu an tarlang.