MLA-in kawng siam mek dinhmun a enfiah

Assembly deputy speaker Lalfamkima, Kolasib bialtu MLA chuan nimin khan a bial chhung Zero Point aṭanga Bairabi panna kawngpui thawm ṭhat mek dinhmun a hmunah kalin a enfiah.

Lalfamkima chuan Bairabi kawng chu kawng ṭangkai leh pawimawh tak a nih thu sawiin, "He kawng chhia hi ka vei hle. Hun rei tak inenkawla ka awm avangin a hma lamin ka tlawh thei loa, ka theih veleh ka hun neih hmasa berah ka rawn tlawh nghal a ni," a ti.

Kawng a that theih nana theih tawp chhuahtu PWD-te chungah lawmthu sawiin Bialtu MLA chuan, kawng chhia avanga harsatna hun rei tak lo tuar tawhtu, kawng dunga khaw mipuite hriatthiamna a dil.

Lalfamkima chuan tun dinhmunah fur ruah sur a nasat avangin contractor-ten an duh angin hna an thawk thei rih lo tih sawiin, mipuite tlan tlang theih nan kawng chu a 'single lane' chin tal thawm ṭhat phawt a, a khuar zual laite lunga hnawhkhat contractor-te a chah.

Dy Speaker ṭawiawmtu PWD engineer-te sawi danin, he kawng siamna atan hian sorkarin cheng nuai 2,752.82 a ruahman (sanction). A chhang hniam bertu Tanor Engineering-te hnenah cheng vaibelchhe 15.94 in hna hi pek niin, June 30, 2025 khan an thawk ṭan a, thla 11 chhunga zo tura contract ziah a ni.

Amaherawhchu, contractor te hnathawh hi a chhe hle a, hun tiam chhungin an thawk zo thei lo. Chuvangin, Mizoram sorkar pawhin Monsoon Damage Repair Fund aṭangin kawng chhia thawmṭhat hna atan Rs 34,01,800 a ruahman belh a, he sum aṭang hian kawng siamna tura lung lakkhawm leh supply hna thawh mek a ni.