Ramdinpuii thih chhan hriat a ni tawh; Tualthattua rinhlelh man an la awm lo

August 5, 2026 chawhma dar 10 vela thia hmuh H Lalramdinpuii (15) d/o H Lalawmpuia, Mualṭhuam North chu a áwma chemtea vih vanga thi a ni tih finfiah a ni. Hetihlai hian, tualthattua rinhlelh man an la awm lo.

August 6, 2026 khan Lunglei Civil Hospital-ah H Lalramdinpuii taksa endik a ni a, post mortem examination (PME) report chu Lunglei Police-in August 12 zanah an dawng. PME report aṭangin H Lalramdinpuii chu a áwma vihna vanga thi a ni tih hriat a ni a; a laka mipat hmeichhiatna zawnga chêtna sûlhnu hmuh a ni lo.

Hetihlai hian, Lunglei police-te chuan an hnuchhuina atana pawimawh tur Foresic Science Laboratory lamin an endikna report an la dawng kim lo thung.

Vanglaini palai zawhna chhangin police hotute chuan, theihtawp chhuahin H Lalramdinpuii thihna an chhui thu an sawi a, "Tun dinhmunah chuan rinhlelh man kan la nei lo. Theihtawp kan chhuah zel dawn a, finfiahna awm thei tur angte kan dap khawm zel a ni," an ti.

Police hotute chuan, Special Investigation Team (SIT)-in Mualṭhuam North an chhuahsan chhan sawiin, "Mualṭhuam North-ah police station a awm lo a, police station lamah tih turte an neih vang a ni," a ti a, niminah pawh SITin Mualṭhuam North an tlawh leh thu an sawi.

Tarlan tawh ṭhin angin, H Lalramdinpuii hi August 3, 2026 zan dar 8:30 vela a chhuak chu chin hriat lohin a awm zui a, khawtlangin an zawn hnuah August 5 chawhma dar 10 velah Mualṭhuam North Middle School hnung lamah thia hmuh a ni a, August 6-a a ruang endik a nih hnuah zanah vui a ni.