CM-in min bum vangin Independence Day a hranpain kan lawm dawn - MADC CEM

Mara Autonomous District Council (MADC) sorkar chuan an sum dil chungchangah chief minister Lalduhoma'n a bum nia an hriat avangin vawiina state sorkarin Indepdence Day a lawmnaah tel loin, a hranin an lawm dawn.

Vanglaini palaiin Independece Day a hranpaa an lawm chhan tur a zawhna chhangin MADC chief executive member M Laikaw chuan, tun hma aṭangin sum indaih lohna an neih chángin revised estimate an siam ṭhin thu a sawi a, "State sorkar chuan revised estimate kan siamte min pe mai ṭhin a, budget-a telh hman loh hman ngaite a awm ṭhin. ZPM an sorkar hnuah min pe duh ta lo a ni," a ti.

M Laikaw chuan, sorkar hnathawk pension-in an chhuahpui vang te, MDC hlawh pung vang te, DA pung vangte leh MADC-a thawk rei tawhte dah ngheh vangtein sum indaih lohna an neih thu sawiin, "MLA hlawh a pun rualin MDC hlawh kan tipung ve a, MNF sorkar khan min pawmsak duh lo," a ti a, ZPM sorkar hnuah MDC hlawh tihpun chu pawm a nih thu a sawi.

Sum indaih lohna cheng nuai 2,588.30 an neih thu sawiin M Laikaw chuan, "CM hnenah ziakin vawi tam kan thlen a, hmaichhanah ṭum li kan hmu tawh. Kan MLA pahnihte nen pawh kan hmu a, 'Ka duhsak che u' tiin, official-te a phone a, a 'genuine' a lawm te a lo ti ṭhin. Mahse, pawisa min pe chhuang lo. Inbumna niin kan hria, kan CM hian min bum a ni," a ti.

MADC CEM chuan, thla khat leh a chanve vel hlawh turah harsatna an neih thu sawiin, "Hlawh pek theih a nih loh avang hian kohhran, zirlai dawrkai leh ram mipuiin kan tuar. Tun hma aṭangin hriat lâwk loh thil lo kal chu revised estimate siamin kan hmu ṭhin," a ti a; harsatna siamsak an nih laia state sorkar programme-a tel a rem loa an hriat thu a sawi a ni.