Lane driving ngai pawimawh turin chah

Aizawl Traffic Police chuan hriattirna chhuahin, Aizawl kawngpuiah mi tinte an him zawk theih nan lirthei khalhtu leh kawngpui hmangtute traffic rules ṭha taka zâwm turin an ngen a; lane driving ngai pawimawh turin lirthei khalhtute an chah.

Traffic Police chuan, Aizawl chu mahni tlanna lane-a lirthei khalh chungchangah state páwn thlengin a ṭha zawnga hriat a ni tih sawiin, "Dan kengkawhtute leh mipui ṭanrualna vang a ni," an ti a; chutihlaiin, two wheeler khalhtu ṭhenkhatte, lane páwn lama tlan ching an awm thu an tarlang.

Two wheeler khalhtu zingah mahni tlanna lane páwnah tlan a, traffic jam lai pawha anmahni tâwk zawnga tlante kal theih miah loa four wheeler sira din thuah ṭhin an awm thu sawiin Traffic Police chuan, "Hei hi anmahni tâwk zawnga lo kalte chanvo (right of way) palzûtna, traffic jam siamtu leh traffic rules bawhchhiatna a ni. Keimahni tâwk zawnga lirthei lo kalte an tlan theih dawn loh chuan four wheeler hnungah mahni lane-ah din mai ṭhin tur a ni a, line marking a awm loh pawhin kawngpui zatve hi lehlam aṭanga lo kalte chanvo a ni tih hi hriat tur a ni," an ti.