Kristian Hla Bu thar tlangzarh a ni

Kristian Hla Bu thar chu nimin chawhnu khan Mission Veng Kohhran biak-inah Synod moderator Rev. John Raldosanga'n Pathian hnena hlanin a tlangzarh a, lei theiha zawrh nghal a ni.

Kristian Hla Bu thar hlanna inkhawm hi Synod executive secretary Rev. Dr K Lallawmzuala'n a kaihhruai a, executive secretary Rev. Rosiamliana Tochhawng-in Kristian Hla Bu buatsaih dan a sawifiah. Mizoram Synod Choir leh Aizawl Area Baptist Choir ten hla an rem.

Kristian Hla Bu tharah hian hla 650 a awm a; hemi hmaa KHB hman laiah hla 600 a awm a, chung zinga 20 chu KHB tharah paih a nih laiin, hla 70 dah thar a ni thung. Hla thu leh solfa tihdanglam eng emaw zat a awm bawk. Kristian Hla Bu tharah hian lengkhawm hla 'key' dah thar a ni a, copy 3,00,000 chhut a ni.

Kum 2019-a Synod Inkhawmpuiin a rêl angin KHB thar siam turin hmalak ṭan a ni a, BCM nen Joint Committee din niin, September 1, 2023-ah an ṭhukhawm ṭan. Hla Bu Ennawntu Sub-Committee din a ni a, anni hian hma an la zui a ni.

Kristian Hla Bu hmasa berah hla 18 a awm a, kum 1898 khan Eureka Press, Calcutta-ah chhut niin, copy 500 chhut a ni.