Independence Day lawm a ni dawn; Larsapin zalenna hlutzia hre turin mipuite a chah

Vawiin hi India-in Britain laka zalenna a hmuhna ní, Independence Day vawi 80-na a ni a, Mizoam pumah lawm a ni dawn. Larsap Gen. Dr Vijay Kumar Singh chuan, zalenna avanga ram zalen leh inrelbawlna hran neih hlutzia hre thar turin Mizoram mipui a chah.

Independence Day (I-Day) hi Aizawlah chuan Lammualah lawm a ni dawn a, zing dar 9-ah ṭan a ni ang a, chief minister Lalduhoma'n hnam puanzar a pawt pharh ang. Minister dangte pawhin district khawpui hrang hrangah an hmanpui dawn a ni.

Governor Gen. VK Singh chuan nimin khan I-Day thuchah a tichhuak a, Mizoram mipuite I-Day chibai bûkin, zalenna avanga ram zalen leh inrelbawlna hran neih hlutzia hre thar tur te, tlawmngaihna chhawmnung zel a, ṭanpui ngaite pui zel turin Mizoram mipui a chah.

Larsap chuan, "Kan mi leh sa zalenna sualtu ngaihsanawm tak tak - Lalnu Ropuiliani, Nikuala, Lianphunga Sailo, Zakapa, Khuangchera leh zalenna sualtu dangte zahna chibai kan bûk a, an huaisenna leh inhlanna avangin India ram zalen leh kan ngainat em em hian tun dinhmun hi a thleng thei a ni," a ti.

Mizoram chu khawtlang ralmuang, ziak leh chhiar tam, sik leh sa nuam, boruak thianghlim, dan zâwm ṭha leh khawtlang inpawh ṭha tak a nih thu sawiin, chungte chu hmasawnna chak zawk thlenna atan hman ṭangkai tum turin Gen. VK Singh chuan mipui a chah a ni.

Larsap chuan, Act East Policy kaltlangin Mizoram leh India hmarchhak bialin hmasawnna a hmu tih sawiin, "Bairabi-Sairang rêl kawng hi Mizoram chhim tàwp Zorinpui thlenga kaltir tum a ni a, kan nghahhlelh em em kum 2027-a chhawr theih tura beisei Kaladan Multi-Modal Transit Transport Project nena thlun zawm tum a ni. Hmasawnna ruhrel lian leh danglam dâwrhna thlen theite hi ṭha taka lo dawngsawng a, ṭangkai zawka hmang thei turin rilru lam thlenga kan lo inpuahchah lâwk a ngai a ni," a ti.