KHAWTHLIR

KṬP-in thisen pe

KṬP, Leitan East Branch chuan nimin khan thisen pek huaihawtin, Synod Hospital tan thisen unit 29 an pe a, petute mipa 25 leh hmeichhia pathum an ni.

Traffic awareness

Aizawl Traffic Police chuan nimin khan ICFAI University-ah Traffic Awareness Campaign an buatsaih. ICFAI University zirlai 200 chuang an tel a; traffic sherista Lalawmpuia'n lirthei kaihhnawih dan leh hraite zirlaite a ziritir a, zawhna leh chhanna hun hmang a ni bawk.

Project siam endik

Chief minister Lalduhoma hoin nimin khan CMO conference hall-ah Planning & Programme Implementation department hotute'n an ṭhukhawm a, department hrang hrang aṭanga lut NABARD Rural Infrastructure Development Fund hnuaia project proposal 88 leh Urban Infrastructure Development Fund hnuaia project proposal 17 an endik.

PM-SETU zirho

LESDE department chuan nimin khan an conference room-ah PM-SETU zirhona, Industry Outreach Workshop an buatsaih a, LESDE secretary Dr Lalhriatzuali Ralte-in a hawng. Industry, financial institution leh skill training institution aiawhte leh LESDE department-a thawktute an tel a, hlawhtling taka PM-SETU kalpui theih dan tur leh thawhho dan tur sawiho a ni.

NE Service Hub chungchang zirho

Mizoram Youth Commission chuan nimin khan an conference hall-ah North East Service Hub (NESH) online job portal chungchang inzirtirna an buatsaih. NESH hi October 2026-ah tlangzarh tum a ni a, Mizoram bakah, hmachhak state hrang hranga hna zawngte leh hna thawh tur neite inkarah mobile phone hmanga inbiakpawh theihna a siam dawn a ni.