Kan rama kan mamawhte siam hi kan economy chawi kân nan tihmakmawh - CM

Chief minister Lalduhoma chuan nimin khan Lengpui Vengtharah Dr Lalrokhawma te chhungkaw din Samuel Lifecare & Cosmetics Private Limited Company a hawng a; Mizorama mamawhte siam ve theih chu economy chawi kanna atan tihmâkmawh a nih thu a sawi.

Lalduhoma chuan, Samuel Lifecare & Cosmetics Pvt. Ltd hawn a ni ta chu Mizoram bakah India hmarchhak tan chhinchhiah tlak a tlin thu a sawi a, "Mizoramah hian kum tin consumer goods leh cosmetics-ah pawisa kan seng tam em em a, state pawn aṭanga kan lak luh a ni a, kan pawisa thawh chhuahte state páwnah an chhuak zung zung ṭhin. Kan ram ngeia kan mamawh thilte siam ve theih hi kan economy chawi kân nana tihmakmawh a ni," a ti.

Samuel Lifecare & Cosmetics siam chhuahte chu anmahni zirbingna aṭanga an hmuh chhuah behchhana siam a nih thu sawiin CM chuan, "Cosmetics lamah phei chuan India hmarchhaka a hmasa ber leh a awm chhun a nih hmel a, Mizoram leh India hmarchhak tan mellung thar an phun tihna a ni. Kan sorkar aṭangin hetiang lama hmasawn dan hi kan ngaihven nghal a ni," a ti a, Handholding scheme-in a tum ber chu thil thar tichhuak thiamte bána kaih a nih thu a sawi.

Chief Minister chuan, thil thar ngaihtuah chhuak thiamte ṭanpuitu tur Innovation Centre leh Incubation Centre a awm thu sawiin, "Bána Kaih Venture Capital Fund kan la nei leh zel a, kan rama siam chhuahte a tam thei ang ber hman hi sorkar duh dan a nih avangin The Mizoram Preferential Store Purchase Rules pawh kan siamṭha a, kan entrepreneur-te kutchhuak ngaihhlutsak kan duh," a ti a; Mizo thil siam ngaisanga hmang tam turin Mizoram mipui a chah.

Samuel Lifecare & Cosmetics hawnna inkhawm hi Lengpui VCP Lallawmthanga'n a kaihruai a; khualzahawm FDA jt director (Rtd) Lalsawma Pachuau leh company dintu Dr Lalrokhawma te pawhin thu an sawi.

Company hian kum thum chhung zirbingna an kalpui hnuah cosmetic chi 46, homecare products chi kua leh food supplement chi hnih an siam chhuak a; dawr an la neih loh avangin an thilsiamte lei duh/zuar chhawng duhte chuan phone number 8167379173-ah biak theih a ni.