Dan loa pension lak tihreh dan tur Kohhran hruaitute hrilhfiah an ni

Aizawl District Treasury chuan kohhran hrang hrangte tan nimin khan Assembly Annexe conference hall-ah dan loa pension/family pension lâk tihreh dan tur chungchang inhrilhhriatna an buatsaih a, kohhran 34 aiawh an tel.

Inhrilhhriatnaah hian Accounts & Treasuries (Local Fund Audit & Pension) director Malsawmdawngliani'n dan anga pension lak theih dan leh, dan loa pension/family pension lak awm ṭhinte chungchang zirchianna (case-study) hmangin a sawifiah.

Malsawmdawngliani chuan, mahni duh thu ngeia dan loa family pension late'n pension an lakna sorkara an pek let chuan sorkarin a ngaidam dawn a, pawisa a rulhtir dawn loh thu a sawi a, "September 2026 hnu lamah chuan ngaihhnathiamna awm tawh loin, court-ah dan hmangin BNS emaw, BNSS emaw hnuaiah thubuai siamsak an ni ang," a ti a, pawisa chawi bakah jail-a tàn thlengin dan hnuaiah hmalak a nih dawn thu a sawi.

Dan loa family pension la mekte chu pension an lakna sorkara pe let tura ngenin Malsawmdawngliani chuan, pension an lâkna ṭheuh Treasury Office-ah surrender-na form hmanga an PPO pe kîr turin a chah a, "Hun tiam a ral hnuah chuan Task Force hmanga endik a ni tawh dawn. Document dik lo pe chhuaktute thlengin dan ang taka an chunga hmalak a ni tawh ang," a ti.

Dan loa pension/family pension lak chungchanga kohhran, VC/LC leh YMA bâkah, sorkar department-te mawhphurhna pawimawhzia sawiho a ni a; Treasury hotute chuan kohhran hruaitute chu an mi leh sâte dinhmun (nupui/pasal neih emaw pian/thih ni leh eizawnna) sorkara thehluh tur hriatpuina lehkha dik tak chauh pe chhuak tura ngen an ni.

Kohhran hrang hrang aiawh kal khawmte chuan, an theih ang anga sorkar an thawhpui tur thu an sawi hlawm a ni.