Aizawlah Red Ribbon Quiz buatsaih

District AIDS Prevention and Control Committee chuan nimin khan Vaivakawn Cultural Centre-ah Aizawl District Red Ribbon School Quiz an buatsaih a; school level screening neih tawha ti ṭha sikul 10 an intihsiak.

Red Ribbon School-ah hian Modern English Higher Secondary pakhatna an ni a, Mount Carmel School pahnihna niin, Sairang High School pathumna an ni. Modern HSS hi state level Red Ribbon Quiz Competion-ah Aizawl district aiawhin an tel ang.

Intihsiakna ṭan hma inkhawmah Aizawl West chief medical officer Dr Lalawmpuia Chhangte chuan, HIV/AIDS donaah thawhhona ṭha neih a ṭul thu sawiin, "Sikul naupang, zirtirtu, Health department official leh School Education department ten kan awm hmun ṭheuhah HIV/AIDS do kawnga theihtawp kan chhuah a ṭul," a ti a; HIV laka an him theih nan nun uluk tur te, thianghlim leh entawn tlaka awm tur leh, HIV donaah theihtawp chhuah turin zirlaite leh zirtirtute a sáwm.