Naupang chungchangah fimkhur turin MSCPCR-in pawl leh mipui an ngen

Mizoram State Commission for Protection of Child Rights (MSCPCR) chuan, naupang kaihhnawih pawikhawihna a thlenin, naupangte dikna leh chanvo humhim kawngah fimkhur lehzual turin mipui leh media-te an ngen a; nawrh leh lungawi lohna lantirnaah kumtlinglote hmatheh lo turin pawlte an chah.

MSCPCR chuan thuchhuah siamin, hursualna kaihhnawiha naupang - pawikhawihna tuartu emaw, tisualtu emaw pawh ni se, POCSO Act, 2012 Section 23-in an hming, thlalak, veng leh khua, etc., emaw, anmahni chhui chhuah theihna tur lam zawngin thuchhuah leh thehdarh khap a nih thu an tarlang a ni.

Tun hnaiah Cachar district, Assam-ah Mizoram mi kumtlinglo pahnihin rûkbo leh pawngsual an ni chu pawi an tih thu sawiin MSCPCR chuan, "Pawikhawihtute man thuai an ni hi lawmawm tak zet," an ti a; dan anga dik taka an chungthu rel a nih theih nan Assam State Commission for Protection of Child Rights hriattir an nih thu a tarlang.

MSCPCR chuan, pawl hrang hrangin sorkar laka lungawi lohna leh nawrh an huaihawtnaah zirlai, kumtlinglo an teltir ṭhin chu naupangte hmakhua leh an tana ṭha ber (best interest) a nih loh thu an tarlang a; nawrhna leh lungawi lohna lantirna reng rengah naupangte hmatheh tawh lo turin pawl leh mipui an chah a ni.