Chhuan lo la awm zel turte tana chenna tlak siam a ngai - Larsap
August 15, Inrinni khan Lammuala Independence Day lawm zawhah Larsap Gen. Dr Vijay Kumar Singh chuan Lok Bhavan-a Circular Lawn-ah sawm bikte tan Governor's At Home a buatsaih a; chhuan la awm zel turte tana chenna tlak siam a ngaih thu a sawi.
Governor chuan, ram chhung hmun kilkhâwr ber thlengin hmasawnna chak taka kalpui mek a nih thu sawiin, "Mizoram pawhin hei hi a tawng chho mek. Remchannate leiin state ṭhang duang tak, chhuan lo la awm zel turte tana chenna tlak kan siam a ngai a ni," a ti.
Bairabi-Sairang rel kawng hawn a nih hnuah, Mizoram chhim tàwp Zorinpui thlengin rel kaltir tum a nih thu sawiin Larsap chuan, "Rel kawng leh Kaladan Multi Modal Transit Transport Project ten danglamna nasa tak a thlen dawn," a ti a, hmasawnna lo thleng tur atan kan lo inpuahchah lâwk a ṭul thu a sawi.
Gen. VK Singh chuan, Mizoram mawi leh hnam ziarang hausa tak te, rimawi, ei leh in bakah, mikhual chunga ṭhatnate chu khualzin tam zawk hîp luh nana pawimawh thu a sawi a; agriculture, ei leh in sâwngbâwl, thiamhnáng deh, puantah leh thil danga tualchhung deh chhuahte hralhna atan market linkage nghet tak din a ṭul thu sawiin, "Khawhawi tihzauh a, hawiher zîm lutuk nuai bo a ṭul," a ti.
Mizo ṭhalaite chu thil thiam zung zung leh taima an nih avangin India ram mai ni lo, khawvel huapa inelnaah tel tum tura chahin Governor chuan, "Civil service, IIT, IIM, medical zirna, university, defence service leh a dangahte Mizo ṭhalai tam zawk an luh theih nana hmalak a ṭul," a ti a; ṭhalaite'n inring tâwk tak chunga hmun dang an pan a ngaih thu a sawi.
Larsap chuan, Mizo ṭhalaite'n inelna hmanga hlawhtlinna leh tawnhriat an neihte Mizoram tan an hawn a ṭul tih sawiin, "Hmasawnnain Mizoram danglam bikna, hnam ziarâng hausa tak, khawtlang inlungrualna, chhehvela thil awm leh khawtlang thil hlu tak takte a tih chhiat mai loh nana kan humhalh tlat a ṭul," a ti.
Governor's At Home-ah hian chief minister Lalduhoma, chief minister hlui pahnih Lal Thanhawla leh Zoramthanga, Assembly speaker Lalbiakzama, MLA, sorkar officer-te leh sawm bik eng emaw zat an tel a ni.