KHAWTHLIR

Thisen pe

Higher and Technical Institute, Mizoram (HATIM) NSS leh Red Ribbon Club chuan August 14, 2026 khan an auditorium-ah thisen pek an huaihawt a, Lunglei Civil Hospital tan thisen unit 90 an pe a, petute mipa 67 leh hmeichhia 23 an ni.

Home Minister-in Kolasib PS tlawh

Home minister K Sapdanga chuan, August 15, Inrinni khan Kolasib Police Station a tlawh. Minister chuan, police-te chu mi mangang leh ṭanpui ngaite puitu tur an nih hre reng turin a chah a, "Police station-te hi a mamawh apiang ban phakin kan siam tur a ni. PS-ah FIR thehlut duh an awmin, anmahni tihnual zawnga lo dawngsawng loin, an mamawh ang ngeia kan lo ṭanpui hi kan tihmâkmawh a ni," a ti. Home Minister hin 1st Indian Reserve Police hmunpui, Mualvum a tlawh nghal a, Kawnpui leh Khamrang inkar kawng a enfiah bawk.

Meizial man

Assam Rifles leh Champhaia Legal Metrology department mite chuan an thu dawn bawhzuiin August 14, 2026 khan Champhai dai Khankawn kawngah ram dang mezial dan loa lak luh chi hnih - Patron báwmpui (case) 73 leh ORIS báwmpui 64 an man. Foreign cigarette-te hi lirthei pahnih aṭangin man a ni a, a kaihnawihah mi pahnih man tel a ni.

Minister-in hawng

August 15, Inrinni khan Education minister Dr Vanlalthlana'n TM High School, Champhai Zote-ah Integrated Maths & Science Lab leh office building thar a hawng. TM High School Integrated Maths & Science Lab hi Rs 28,21,304 sênga din niin, a dung ft 33 leh a vâng ft 16.5-a zau a ni a, April 1, 2026 a sak ṭan niin, July 30, 2026-ah zawh a ni. Teachers Office building sak thar chu UDPA depatrment hnuaiah cheng nuai 10 senga sak a ni.

Thupek kenkawh dan tur sawiho

Serchhip DC Paul L Khuma hoin tun hnai khan dan lam thiamten BNSS leh BNS hnuaia District Magistrate/DC khapna thupekte khauh taka kenkawh dan tur an sawiho a; dan anga hmalakna kawngah tihsual a awm loh nan leh dan ang thlapa hremnate chak taka kalpui dan turte an rel.