Minister Lalthansanga'n Hnahthiala a department chan pisate a tlawh

Minister Lalthansanga chuan August 15, Inrinni khan Hnahthiala a department chan pisate a tlawh a, Hnahthial DC K Vanlalruati leh additional DC Zothanmawia Khiangte ten an ṭawiawm.

Sericulture department pisa a tlawhnaah thawktute'n an hmalaknate an lo hrilh a; Lalthansanga chuan, Mizoramin Muga Silkworm hmanga hmalak theihna a ngah thu sawiin, "Mizoramah ‘Farm to Fashion’ kalpui a nih theih nan a ṭul anga hmalak kan tum," a ti.

Lalthansanga chuan Land Resources, Soil & Water Conservation pisa a tlawhnaah ṭhelrêt lamah zau zawka hmalak a nih theih nan ṭan la turin thawktute a chah a; an pisa sak ṭhatna turin a ṭul anga hmalak a nih tur thu a sawi.

Hnahthial Forest Range Office a tlawhnaah EFCC Minister chuan, an mamawh hrang hrangte a ngaithla a, an mamawhte chu ngaihtuah chhunzawm a nih tur thu a hrilh.

Fisheries department pisa tlawh chhunzawmin Lalthansanga chuan, sanghaah Mizoram a intodelh theih nan CM Fisheries Mission kalpui leh tum a nih thu a sawi a, "DPR siam mek a ni. Mizoram State Fish, Nghavâng a rêm mai loh nan khawi pun kan tum," a ti a, Nghatun khawi pun eng emaw zat pawh Chief Minister hoa chhuah an tum thu a sawi.

Lalthansanga chuan, mipui thîkthu a chhiat tawh avangin thawktute chu dik tak leh ṭha taka hna thawk turin a chah a, "Scheme kaltlanga hamṭhatnate hi a dawngtu tur dik tak leh dawng tlak chauhin an dawng tawh dawn. Data based leh output driven-in scheme-te chu kalpui a nih tawh dawn a ni," a ti.