Hmun hrang hrangah Independence Day lawm

Kumpinu awpna aṭanga India ramin zalenna a hmuh ní, Independence Day vawi 80-na chu August 15, Inrinni khan Mizorama district khawpui tinah lawm niin, minister-te'n an hmanpui a; lawmman leh chawimawina hrang hrang sem a ni. SDO (Civil) leh BDO ṭhuthmun khaw ṭhenkhatah leh hmun dangahte lawm a ni bawk.

LUNGLEI

I Day hi Lungleiah chuan minister Lalrinpuii hoin C Ṭhuamluaia Mualah lawm a ni a; minister hian hnam puanzar pawt pharhin, parade contingent 27-te hnam puanzar chibai bûk a chhang lêt.

Lalrinpuii chuan, MUHCS 2.0-ah sorkar hnathawk leh pensioner-te nen chhungkaw 3,20,123 (mi 10,13,856) an inziak lut tih a sawi a, "Kumin chhunga mipui damlo enkawlna atana sorkarin a senso zawng zawng cheng vbc 68.32 a tling tawh," a ti.

Lungleia I Day lawmnaah hian armed contingent paruk, unarmed contingent pakua, school contingent 10 leh pipe band pahnih an tel. Unarmed contingent-ah Baptist English School Bharat Scouts & Guides pakhatna an ni a, school contingent-ah 2nd MAP English Medium School, Luangmual pakhatna an ni.

SIAHA

Siahaah chuan SDFA Playground-ah minister of state Lalnghinglova Hmar hoin I-Day lawm a ni a; minister hian hnam puanzar pawt pharhin parade contingent 23-te hnam puanzar chibai bûk a chhang lêt.

Lalnghinglova Hmar chuan, hriselna, zirna leh eizawnna bakah, thil dang tam takah India ramin hma a sawn hle tih a sawi a, "Siaha district-ah pawh mipui hamṭhatna atan hmalakna pawimawh tak tak a awm a ni," a ti.

I Day lawmnaah hian armed contingent pahnih, unarmed contingent pathum, pipe band pakhat leh school contingent 17 an tel a; school contingent-ah Little Diamond English School pakhatna niin, unarmed contingent-ah NCC Don Bosco pakhatna an ni.

CHAMPHAI

Champhai Chhangphut Field-ah I Day lawmna chu minister Dr Vanlalthlana'n hmanpuiin, hnam puanzar a pawt pharh a, parade contingent 18-te hnam puanzar chibai bûk a chhang.

Dr Vanlalthlana chuan, Samagara Shiksha hmalaknain Champhai district-a sikul awm tawh sate thuam chak a nih thu a sawi a, "PM POSHAN Scheme (mid day-meal) hnuaiah Champhai district-a sikul 147-ah naupang 10,983-te ni tin chawchhun pek an ni," a ti. Champhai College chu Mizorama sorkar enkawl college zinga stream ngah ber a nih thu leh, PM-USHA hnuaiah building thar cheng vbc 3.7 sengin sak a nih thu a sawi bawk.

Champhaia I Day parade-ah hian unarmed contingent-ah GM HSS NCC (Boys) pakhatna an ni a, school contingent-ah Roseland Middle School-te pakhatna an ni.

KOLASIB

Home Minister K Sapdanga hoin Kolasib Sports Stadium-ah I Day lawm a ni a; minister hian hnam puanzar a pawh pharh bakah, parade contingent 19-te'n hnam puanzar chibai bûk a chhang lêt.

K Sapdanga chuan, Kolasib District Police-te'n kumin January-July chhungin thubuai 91 an ziak lut a, thil bo kaihhnawihah Rs 8,16,054 hû an hmuh let thu a sawi a, "Middle school hrang hrangah ruihhlo kaihhnawih laka fihlim tura inzirtirna neih a ni tawh," a ti. PMAY(U) 1.0 hnuaiah in sak tura ruahman aṭangin 86.25% sak zawh tawh a nih thu sawiin, "PMAY(U) 2.0 hnuaiah chhungkaw 94 hnenah ṭanpuina pek a ni a, phase II atan mi 143 pawm a nih tawh bawk," a ti.

I Day lawmnaah hian armed contingent pakhat, unarmed contingent panga, school contingent 12 leh pipe band pakhat an tel a; school contongent-ah DIET Kolasib pakhatna an ni a, unarmed contingent-ah Kolasib College NSS pakhatna an ni.

SERCHHIP

Serchhipah chuan Serchhip Sports Complex-ah I Day lawm a ni a; minister Vanlalhlana'n hnam puanzar pawt pharhin parade contingent 17-te hnam puanzar chibai bûk a chhang.

Vanlalhlana chuan, PWD Serchhip Division-in km 49.600-a thui kawng an sial thar thu a sawi a, "Kawng blacktop km 43.7 leh cement-a luan km 161.172-a thui an siam," a ti a, culvert 53 leh lei tawlh venna (protection wall) .893 Rm an siam tih a sawi.

Serchhipa parade-ah parade contingent school 12 leh unarmed contingent panga bakah, band party pakhat an tel a; school contingent-ah Serchhip HSS leh un-armed contingent-ah Serchhip HSS NCC-te pakhatna an ni.

LAWNGTLAI

Central Young Lai Association khelmualah minister of state B Lalchhanzova hoin I Day lawm a ni a; minister hian hnam puanzar a pawt pharh a, parade contingent 15-te'n hnam puanzar chibai an bûk.

B Lalchhanzova chuan, January-July 2026 chhungin Lawngtlai DCSO-in buhfai quintal 48,733.23 a dawn thu a sawi a, "Buhfaite hi interior supply centre 11-ah rualkhai taka sem a ni a, fûr laia lirthei luh theih lohna supply centre pariatah fûr chhung daih tur buhfai dah tawh a ni," a ti.

Lawngtlaia I Day parade-ah armed contingent pakhat, unarmed contingent panga, school contingent pariat leh brass band pakhat an tel a; school contingent-ah Jehova Jireh English School leh un-armed contingent-ah NCC, Don Bosco School pakhatna an ni.

MAMIT

Mamitah chuan GSA Playground-ah I Day lawm a ni a, minister PC Vanlalruata'n hnam puanzar pawt pharhin, parade contingent 14-te'n hnam puanzar chibai an bûk a chháng lêt.

PC Vanlalruata chuan, sorkarin kut hnathawktute hma ngaiin Bána Kaih hnuaiah sawhthing a lei thu a sawi a, "Mamit district-ah sawhthing qtl 7,332 chuang hralh tawh niin, Rs 3,66,62,500 chuang sawhthing chingtute’n kumin chhungin an la lut tawh," a ti. Mamit district aṭangin oil palm rah metric ton 125 chuang hralh a ni a, oil palm chingtuten Rs 1,96,27,775 an lak luh thu a sawi.

Mamita I Day lawmnaah hian armed contingent pakhat, unarmed contingent pali leh school contigent pakua bakah, Mamit H/S Pipe Band an tel. School contingent-ah PES Girls leh unarmed contingent-ah Mamit College I Mizo Bn. NCC pakhatna an ni.

SAITUAL

Saitualah chuan Keifang Centenary Sports Complex-ah I Day lawm a ni a, minister of state F Rodingliana'n hnam puanzar a pawt pharh a, parade contingent 18-te'n hnam puanzar chibai an bûk.

F Rodingliana chuan, Power & Electricity department-in Solar Rooftop Subsidy scheme a kalpui mek tih sawiin, "Saitualah hian solar rooftop 16 vuah tawh a ni a, Saitual town chhunga power load tihzangkhai nan transformer thar pathum neih belh a ni," a ti a; kawlphetha megawatt 24 siam thei Tuirini Hydel Project atan hna thawh mek a nih thu leh MW 132 siam chhuak tur Tuivai Hydel Project pawh rei lo têah hna thawh ṭan beisei a nih thu a sawi.

Saituala I Day lawmnaah hian school contingent (middle section)-ah STS Middle School, Keifang leh H/S & HSS section-ah Saitual HSS-te pakhatna an ni a; unarmed contingent-ah Keifang H/S NCC pakhatna an ni.

KHAWZAWL

Minister C Lalsawivunga hoin Khawzawl Mualvawm Field-ah I Day lawm a ni a; parade contingent 15-te hnam puanzar chibai an bûk.

C Lalsawivunga chuan, Mizoramin Animal Insurance (livestock insurance) ṭha tak a neih thu sawiin, "Kan state history-a la thleng ngai lo a ni a, kumin February aṭangin hman ṭan a ni a, August 11 thlengin vawk, bawng leh kel insurance tih zat chu 4,724 niin, insurance claim pek tawh 219 an awm. Animal insurance claim-tute hnena sum pek tawh zat chu cheng nuai 41.10 a ni," a ti.

I Day parade-ah armed contingent pakhat, unarmed contingent pathum leh school contingent 11 bakah, Khawzawl High School Pipe Band an tel a; school contingent-ah PES Khawzawl pakhatna an ni.

HNAHTHIAL

Hnahthialah chuan minister Lalthansanga hoin District Synthetic Turf Ground-ah I-Day lawm a ni a; minister hian hnam puanzar pawt pharhin, parade contingent 13-te'n hnam puanzar chibai an bûk a chhang lêt.

Lalthansanga chuan, Hnahthial Forest Range leh mipui thawhhona zarah kuminah Hnahthial district-ah ram kâng a la awm loh thu a sawi a, "District Catalytic Intervention Plan hnuaiah Riverine Conservation Project kalpui mek a ni a, Project hnuaiah hian lui dung nungchate humhalh kawngah ṭha zawka hmalak a nih theih nan YMA branch hrang hrang hnenah lui dung humhalh laia dah tur CCTV sem a ni," a ti.

Hnahthiala I-Day parade-ah hian school contingent 11, unarmed contingent pakhat leh 2nd Bn English Middle School Pipe Band, Lunglei an tel a; school contingent-ah FD Higher Secondary School pakhatna an ni.

HMUN DANG

Gauhati High Court, Aizawl Bench-ah pawh Independence Day vawi 80-na lawm a ni a; Gauhati High Court judge Justice Kalyan Rai Surana chuan hnam puanzar pawt a pharh a, 225 Battalion CRPF-te'n hnam puanzar chibai an bûk.

Chief Minister's Office-ah pawh zing karah I Day hman a ni a, CM Lalduhoma'n hnam puanzar a pawt pharh. CMO-a thawkte an tel a ni.