Hna ṭha lo, maimitchhin deuh ngai a tam, a pawi ngawih ngawih - CM Lalduhoma

Chief minister Lalduhoma chuan nimin khan Treasury Square, Aizawla Mizo Hmeichhe Insuihkhawm Pawl (MHIP) General Headquarters in sakna tur lungphùm a phúm. CM chuan, YMA, MUP leh MSU te pawh an hmunhma turah sorkarin hma a laksak thu a sawi a; Mizoramah hna ṭha lo a tam thu a sawi bawk.

CM Lalduhoma chuan, hmasawnna hna thawh mekte chu chak leh ṭha taka thawh ni se an duh thu a sawi a, "Mizoram State Project Monitoring Committee din a ni a, project 90 vel an endik tawh. Hna ṭha lo, building chhawng 4/5 vuak ṭhiah vek loh chuan siam ṭhat theih tawh loh te, retrofiting pawha ṭha zo tawh lo te, maimitchhin deuh mai ngaite a tam em em a, a pawi ngawih ngawih a ni," a ti.

Tlawmngai pawl dangte tan pawh hma an la zel tih sawiin Lalduhoma chuan, "Swadesh Dharshan 2.0 aṭangin Thingsulthliaha YMA ramah Convention Centre lian tham tak kan sa mek a, MUP office pawh vertical extension kan tihsak mek. MSU hi Ainawn Vengah an office hmun tur kan ruahmansak," a ti a; hmeichhiate hamṭhatna bik atan hmun pasarihah working women hostel sak mek a nih thu a sawi.

Chief Minister chuan, MHIP chu hmeichhia leh naupangte tan bika ding awm chhun a nih thu a sawi a, "MHIP hi sorkar bultuma din in nih bawk avangin a theih ang anga tuamhlâwm zui zel che u hi thil tih àwm tak a ni. Aizawl DC pisaah VRC-te'n an thawk mek a, open tender chhuaha contractor dang lak leh a, bungrua in lak khawm vel a buaithlak avangin, anni bungraw chhawp sate hian thawk zui se, tia inrawn rawt angin kan approve a, an thawh theih dawn chuan open tender-a tih a rem lo a, restricted tender-a tih a ngai a, kan tifel tawh," a ti. An in sak tur uluk taka enpui turin MHIP hruaitute a chah.

MHIP hian Aizawl DC Complex chhim lam, Aizawl Press Club bulah in an nei a, April 20, 1993-a an luah ṭan a ni a; sak ṭhat a nih dawn avangin ṭhiah a ni tawh a, SASCI 2025-26 sum nuai 370 hmangin sak a ni dawn.

Chief Minister sawi danin, MHIP in sakna atan hian UDPA department chu expenditure sanction pek a ni a, administrative approval tifel tawh ni mah se, MHIP nodal department Social Welfare department kutah dah leh a ni. UDPA department hnena expenditure sanction pek tawh leh administrative approval tih tawhte chu re-validate turin an buaipui mek. Social Welfare department-a tihfel ngai chinfel a nih hnuah PWD-ah perk a ni ang a, PWD chuan Aizawl DC pisa sa mektu VRC chu restricted tender hmangin an thawhtir dawn a ni.