Kawng siamnaah lung chang ṭha hmang turin contractor-te an chah

Serchhip DC pisaa Inspection Team chuan nimin khan an district chhunga Khumtung leh Keitum inkar NH-02 kawngpui thawm ṭhat mek an endik a; kawng siamnaah lung chang ṭha chauh hmang turin contractor-te an chah.

Inspection Team hian kawngpui ṭha leh tlo zawk an neih theih nan NH enkawltu NHDICL hnuaia contractor pakhat, Kram Infracon Pvt Ltd-in Khumtung leh Keiṭum inkar (km 65-125) an thawm ṭhat mek an enfiah a; kawng chhuat chhia/khuar thawm ṭhat (pot hole repairing) leh an thlen chin te, an hmanraw hmante an endik a ni. Kawngpui ṭha leh tlo an neih theih nan leh lirthei tana tlan nuam tura chak zawka kawng siam tur leh, hmanrua pawh tlo tur ngei hmang turin kawng siamtute an ngen.

Inspection Team chuan, tuna lung an hman leh mek chu duhthusama ṭha ni lo mah se, tun dinhmunah chuan a ṭha tâwk thoah an ngai a; chutihrualin, lung chang ṭha hmang turin an chah. Fûr ruahtui tlak zawhah blacktop nawn leh vek turin an chah bawk.

Baktawng Mualkawi - Keiṭum via Serchhip Bypass hi KRAM Infracon siam a ni a, an kawng siam chu kumin fûrah thawm ṭhat ngaiin hmun tam tak a chhia a ni. KRAM Infracon hotute chuan, chak leh rang zawka siam turin hmanrua leh khawl an ngaihtuah belh mek thu an sawi.

Kawng siam endiknaah hian Serchhip SDC Chawngthu Lalrinhlua, PWD SDO Lalrinhlua, YMA Sub-Hqrs vice president Lalrammuana leh hruaitu dang te, Serchhip District MJA president Kapliana Pachuau leh member dang te, Serchhip Joint VC secretary Lalrinmawia Khiangte leh DIPRO Lalhruaitluanga te an tel a; KRAM Infracon general manager Ayush Tiwari leh a thawhpuite'n an ṭawiawm a ni.