POCSO Act leh ruihhlo chungchangah Police-in zirlaite thil pawimawh an zirtir

Mizoram police-te chuan 'Special Drives against Narcotic Control' tih thupui hmangin nimin khan sikul hrang hrangah awareness campaign an buatsaih a; ruihhlo hlauhawmzia leh inven dan te, Protection of Children from Sexual Offences Act (POCSO) leh cyber crime chungchang zirlaite an zirtir.

Aizawl Police Station leh All Women Police Station chuan Modern Higher Secondary School-ah awareness campaign an buatsaih a, zirlai ṭhahnem tak telin, POCSO Act chungchang leh, damdawi hmanrual leh ruihhlo chungchanga inven dan turte leh hriat tur pawimawh dangte an zirtir a ni.

Siaha PS chuan Siaha Vaihpi High School-ah Special Drive against Narcotics Control an buatsaih a, zirlai 128 an tel a ni. Mamit police-te chuan Mamit M/S-II ah Drug Awareness Campaign an buatsaih a, zirlai 64 leh zirtirtute an tel.

Kolasib PS-a Special Drives for Narcotics Control chuan Rengtekawn H/S-ah awareness campaign an buatsaih a, zirlai 43 telin, ruihhlo laka inven dan tur bakah, POCSO, cyber crime leh a kaihhnawih thil pawimawhte an zirtir. Anti-Drug Pledge Signature Campaign an buatsaih nghal a, zirlaite chuan ruihhlo ti lo turin hming an ziak a ni.

Khawzawl police pawhin nimin khan Khawzawl Model H/S-ah Drug Awareness Campaign an buatsaih a, zirlai 60 leh zirtirtute an tel. Khawzawl PS-a officer in-charge Inspector T Lalnuntluangi'n ruihhlo ṭhat lohzia te, fimkhur a ṭulzia te, ruihhlo laka inven dante a zirtir a ni.