Provincialise nan ṭawngṭai turin inngen

Mizoram Govt. Adhoc Aided High School Teachers’ Association (MIGAHTA) chuan, vawiina Council of Ministers ṭhutkhawmah school provincialisation chungchang ngaihtuah a nih dawn avangin, MIGAHTA member-te chu vawiin chawhma dar 10-ah an sikul ṭheuhah ṭawngṭai turin an ngen.

MIGAHTA chuan thuchhuah siamin, Chief Minister lakah beiseina sang tak an neih thu an tarlang a; Education Minister leh ZPM PAC member-te’n provincialise an nih theih nan theihtawp an chhuahpui avangin an lawm thu an sawi.

MIGAHTA chuan, "Hun rei tak chhung adhoc high school-te khawtlang enkawlna hnuaiah kan awm hnuin kan Chief Minister zahawm takin school provincialisation kalpui a nih leh tur thu a sawi hian kan thla a timuangin, a lakah beiseina sang tak kan nei a, hun rei tak kan lo nghah tawh provincialise dinhmun chu adhoc high school zawng zawngte min pe turin kan ngen a ni," an ti.

Education Minister chungah an lawm thu sawiin MIGAHTA chuan, "Kan dinhmunte hrethiama Council of Minister meeting-a vawi tam tak provincialise kan nih leh theihna tura min thlensak avang leh, a theihna zawng zawng min hman sak avangin lawm thu kan sawi a, a minister-na hnuaiah provincialise lawmna hun kan hman ngei kan beisei," an ti a; ZPM PAC-in sorkar hnena hma an laksaknain rah duhawm tak a chhuah ngei an rin thu an sawi.

MIGAHTA chuan, sorkar laka an thil phût an nawrnaah adhoc H/S awmna khaw hrang hranga VC, Managing Committee, NGO leh political party te nen thawhhona ṭha tak an neih thu leh an lawm thu an tarlang bawk.