Nurse hna hi mi dang tana inpekna a ni - HTE Minister

Multi-Modal Training and Teaching Centre (MMTTC), Mizoram University leh Continuing Nursing Education, ZMCH chuan nimin khan Mizoram College of Nursing (MCON)-ah 'Clinical Skills and Competency for Nursing Managers Workshop' an buatsaih a; Higher & Technical Education minister Dr Vanlalthlana'n hawngin, nurse hna chu mi dangte tana inpekna a nih thu a sawi.

Dr Vanlalthlana chuan, damlote enkawlnaah nurse-te pawimawh thu sawiin, "Clinic leh ward-a an mawhphurhna bakah, an hnuaia thawktute'n ngilneihna nen damlote an enkawl theih nan zirtirtu leh hmahruaitu an ni. An hna hi mi dangte tana inpekna a ni a, Mizo nun ze mawi tlawmngaihna nen pawh a inhmeh hle a ni," a ti.

Thiamna ṭhang zelah damlote enkawlnaah pawh intuai thar zel a ṭul thu sawiin Dr Vanlalthlana chuan, "Hmanraw chhuak thar apiang hmang thiam tura inzir zel a ṭul a, taimak a ṭul," a ti a; zirhonaa telte chu anmahni chauh ni lo, an thawhpuite leh an hnuaia thawkte pawhin hma an sawn theih nan zirhona chu hmang ṭangkai turin a chah.

MMTTC director Prof. K Robin pawhin thu sawiin, damlote tana nurse hlutzia te, indaih lohna karah zan tam tlaivara damlote tan an inpek ṭhin thu te, mipui hrisel kawngah an mawhphurhna a san thu te a sawi a; intuai tharna tur hun ṭha an neih chu hlâwk taka hmang turin a fuih a ni.

Zirhonaah hian Mizorama hmun hrang hrang aṭangin sorkar leh mimal damdawi-ina thawk nurse eng emaw zat an tel a ni.