KHAWTHLIR

Kawng khâr dawn

Serchhip leh Thenzawl inkar kawngpui chu leimin then fai a nih dawn avangin nimin aṭang khan chhun lamah khâr ṭhin a ni. Sailiamkawn bula kawng chhak lam leimin ṭhin chu nimin aṭanga naktuk thlengin then tum a ni a, hei vang hian hna thawh chhung, zing dar 9 aṭanga tlai dar 5 thleng kawngpui khâr ṭhin a ni dawn. Loh theih lohna vanga kal tlang ngaite tan chhun dar 12 aṭang chawhnu dar 1 inkar hawn ṭhin a ni ang.

Phalna la turin lei lai turte hriattir

Champhai district magistrate Mohammad Aaquib chuan thupek chhuahin, fûrpui chhunga him nan in hmun emaw, thil dang emaw atana lei lai turte chu bialtu zonal officer leh village disaster management committee hriatpuina leh phalna la hmasa turin a hriattir. Phalna tel loa lei laih khap a nih thu leh, thupek zâwm lote chu hrem an nih dawn thu a tarlang.

Cheraw zirho

Khawzawl College-a History department chuan nimin khan an college multipurpose hall-ah 'Mizo Ecological Worldviews through Cheraw Dance’ tih thupui hmangin national seminar an buatsaih. Zirhona hi Khawzawl College dept. of history HoD PC Lalrindika'n kaihruaiin, principal Lalruatmawii'n in lawmna thu a sawi a; resource person chu Ahmedabad University-a associate professor Shilpika Bordoloi a ni.

Lushai Hog-in CMRF-ah hlan

Mizorama Harley Davidson bike neitu intêl khawm, Lushai Hog chuan August 16, 2026 khan Chief Minister's Relief Fund atan Rs 1,11,111 an chhung lût a; pawisa hi chief minister Lalduhoma hnenah Independence Day pualin an hlan a ni.

Damlo 23,912 tan vbc 69.81 pe tawh

Mizoram sorkar chuan sorkar kum kal mekah August 14, 2026 thleng khan Mizoram Universal Healthcare Scheme hmangtu damlo 23,912-te enkawlna senso atan cheng vbc 69.81 a pe chhuak tawh. Pawisa hi MUHCS zawmtu damdawi-inte hnenah pek a ni.