Lunglei khawpui mawi taka chei turin hmalak tum a ni - Minister Lalrinpuii

Minister Lalrinpuii, Lunglei East bialtu MLA chuan nimin khan Urban Infrastructure Development Fund (UIDF) sum nuai 200 sênga Lunglei Park cheiṭhat tur lungphùm a phúm a; Lunglei khawpui mawi taka chei turin kawng hrang hrangin hmalakna tum a nih thu a sawi.

Lunglei Park chei ṭhatna tur lungphum phum puala UDPA pisaa inkhawmah Lalrinpuii chuan Lunglei chei mawi chu a tir aṭanga a rilrua lian a nih thu a sawi a, "Unique Lunglei tih hming chawiin mawi danglam bik taka Lunglei chei turin Lunglei Beautification Committee din a ni a, Lungleia MLA-te leh Lunglei Municipal Council councillor-te'n Lunglei cheina tur sum thawh khawma ruahmanna siam niin, hmalak zel a ni ang," a ti.

Lungleia Tarmita Khawthlirah skywalk siam tum a nih thu sawiin Minister chuan, "Ministry of Tourism hnuaia Pilgrimage Rejuvenation and Spiritual Heritage Augmentation Drive (PRASHAD) scheme aṭangin cheng vbc 3 chuang project buaipui mek a ni a, Lunglei mawi taka siam turin LMC thawhpuina leh enkawlna hnuaiah hmalakna hrang hrang kalpui tum a ni," a ti a; project chu a hlawhtlin ngei a beisei thu a sawi.

Lalrinpuii chuan, Lunglei khawpui laili taka awm Lunglei Park chu Lunglei chei mawitu atan leh mipui lên khawthawnna hmun nuam taka siam turin UDPA leh LMC lte nen chei ṭhat dan tur kawng dap a nih thu a sawi a; hna thawktute turte chu ṭha taka thawk turin a chah.

Chanmari chu Lunglei khawpui lailia awm leh khawpui hmel lanna pakhat a nih angin mawi taka chei turin Chanmari Beautification Committee kaltlanga hma lak a nih thu sawiin Lalrinpuii chuan, "Chanmari Thlanmual mawi tak leh kawng ṭha tak siam turin ruahmanna siam mek a ni," a ti a; Chanmari veng chhung bikah kawtkai, in chhung, pisa, zirna-in leh kawtthler vawn fai leh chei mawiah inelna buatsaih tum a nih a sawi.

LMC chairman Lalzuithanga pawhin thu sawiin, "Sorkarin LMC kutah Lunglei Park a hlan aṭangin theihtawp chhuahin chei ṭhat dan tur ruahman a ni. Lunglei Park hmunhma tun hma aṭanga Padma Shri Pu J Buana'n vantlang tana a lo humhalh tlat hi a lawmawm," a ti a; hna thawh lai leh thawh zawh hnua ṭha taka enkawl chu mipuite mawh a nih thu sawiin, theihtawpa venpui turin pawl leh mipui a chah.

Lunglei Park hi UDPA department hnuaiah cheiṭhat tur niin, contractor chu A3 Design Build, Zonuam, Aizawl a ni a, July 30, 2026 khan hna thawh ṭan niin, thla 18 chhunga zawh tur a ni.