Hmun hrang hrangah ruihhlo man a ni

Mizoram Police leh Assam Rifles ṭang dun chuan Mizoram hmun hrang hrangah heroin leh methamphetamine tam tham tak an man.

Zokhawthar police-te chuan August 14, 2026 zan khan Melbuk leh Mualkawi inkarah Yamaha Aerox MZ-01 AD-1455 leh a zuitu maxicab MZ-02 A-4917, Zokhawthar aṭanga Champhai pan chu tihdin an tum a, an tlan tlang luih avangin an ûm zui a, an man a ni.

Lirthei pahnih tlanchhiatna lama an thuhruk methamphe-tamine kg 25.086 an man a; ruihhlo neitua puh Noliankulh (30), Falam, Myanmar, Vanlianthang (24), Leilet, Myanmar leh Bawichung (27), Khawmawi, Myanmar te manin, Zokhawthar Police Station-ah thubuai an ziak lut.

August 15, 2026 zan khan Champhai police-te chuan Zokhawthar aṭanga Aizawl lam pana tlan maxicab MZ-01 G-1167, Satinṭhiauva (39), Tualpui, Zokhawthara cheng mek khalh aṭangin heroin gram 26 an man.

Mizoram Police leh Assam Rifles te chuan August 16, Pathianni chawhma 11:30 vel khan Manipur aṭanga rawn lut Bolero Neo AS-11 Z-7224, Satminthang Kipgen (32), Thenjang, Manipur khalh aṭangin heroin kg 1.180 an man. Lirthei khalhtu man nghal a ni a, thubuai ziah luh a ni.

Assam Rifles leh Ngopa police-te hian August 16 vêk khan Ngopa daiah Manipur aṭanga rawn lut Tata truck AS-25 EC-7197 Debendra Singh (52), Chandrahati, Bihar khalh aṭangin heroin gram 432 an man.

Serchhip police-te chuan nimin khan nupa anga awm dun Rebec Lalbiaknungi leh Lalzawnchhuaha (36), Serchhip Saron Veng te hnen aṭangin heroin gram 2.15 an man bawk.