Minister-in LPG bûr thar a tlangzarh; 'Oil depot nei turin hma kan la zel' - B Lalchhanzova

Indian Oil Corporation Ltd (IOCL)-in eirawngbawlna gas bûr an siam thar Indane Xtralite Now (kg 10 bûr) chu Food, Civil Supplies & Consumer Affairs (FCSCA) minister B Lalchhanzova'n nimin khan State Guest House-ah tlangzarh. Minister chuan, Mizoramah oil depot (tuialhthei chhêk khawlna) a awm theih nan hma an lak zel thu a sawi.

FCSCA Minister chuan, Mualkhang Gas Bottling Plant tihlen leh tihchangtlun hna ngawrh taka an thawh mek a nih thu a sawi a, "Tuna hian hna an thawk tluk tluk a, an thawk chak khawp mai. An zo har lo turah kan ngai. Zawh a nih hun chuan ni tin gas bûr 80,000 vel siam chhuah theih a ni dawn," a ti.

Mizoramin oil depot a neih ngei theih nan hma an lak zel thu sawiin B Lalchhanzova chuan, "IOCL lamah a hmun tur ram a thlawna pek mai bakah, a panna kawng siamsak kan inhuam thute pawh kan hrilh," a ti a; Mizo pa ram inleia lei a, oil depot atana IOCL pek mai theih tur ram a awm thu a sawi.

Supply Minister chuan, oil depot atan senso a sàn thu sawiin, "Cheng vbc 930 vel a ngai dawn. Chuvangin, IOCL chuan senso a sang si a, Mizoramah demand a san si loh avangin viability gap funding zawng turin Mizoram sorkar min duh. Hemi chungchang hi vawiin (August 18) tlaiah CM hoin kan sawiho dawn," a ti.

IOCL State Office, Silchar-a chief general manager A Bordoloi chuan, LPG-ah chawi belh a tam thu sawiin, "Middle East-ah buaina a chhuah hma khan domestic cylinder bûr khat Rs 950-a kan hralhah hian, kan senso chu Rs 1,600 vel a ni," a ti a, buaina a awm hnuah Rs 2,000 vel an sên thu a sawi.

A Bordoloi chuan, India-in LPG a mamawh zinga 30%-35% chiah ram chhungah a siam chhuah thu sawiin, "A bak zawng chu ram dang aṭanga lak a ni. Iran leh Middle East ram dang aṭangin ṭhahnem tak lak luh a ni a, anni nen inremna rei tak awh siam a ni. Chawi belh renga company kal chu a buaithlak hle," a ti.

Indane Xtralite Now chu sumdawnna rate anga bituk a nih thu sawiin Bordoloi chuan, "Domestic cylinder pangngai aiin a to dawn. Mahse, booking a awlsam a, ID proof vel ngai loin awlsam taka book theih a ni," a ti a; awlsam taka lei theih a nih avangin a black-a to tak taka lei ṭhin a reh phah an beisei thu a sawi.

IOCL hotute sawi danin, Indane Xtralite Now hi plastic bûr a ni a, gas thun hmain kg 6 a nih laiin, gas nen kg 16 a ni a, gas hman chin (la awm zat) a bûrah a en theih. Aizawlah chuan a tìra connection neih tirhin a bûr nen Rs 4,900 man a ni a, a hnuah chuan Rs 1,800 man zel a ni dawn. Book aṭanga darkar 3 chhunga inpek (deliver) tur a ni.