Sorkarin minority-te hmakhua a ngai - CM; MGYA-in golden jubilee Aizawlah an lawm

Mizoram Gorkha Youth Association (MGYA) chuan nimin khan Dawrpui Multipurpose Hall-ah golden jubilee an lawm a, chief minister Lalduhoma'n hmanpuiin, jubilee lungphun a hawng. CM chuan, ZPM sorkarin Mizorama hnam tenau (minority) zawkte hmakhua a ngaih thu a sawi.

Chief Minister chuan, Gorkha-te'n Mizoram tan thil ṭha tam tak an tih tawh thu a sawi a, "A bik takin ṭhangtharte kaihhruaina kawngah MGYA hi ṭang sauh sauh se ka duh. Kan sorkar hian minority-te hmakhua kan ngai em em a, an tana thil ṭha kan tih theih chi chu kan ti zel dawn a, thlamuang takin awm u la kan duh," a ti.

Gorkha-te chu tlangmi ve tho an nih avang leh Mizote ang bawka hnam tlawmngai leh nunnêm an nih thu sawiin Lalduhoma chuan, "Kan pi leh pute pawh khan an ngaina em em che u a, chengho tura Khuanu siamsa ang maiin kan inngeih zui ta," a ti a; Mizo leh Gorkha te inkarah tun thlengin innghirnghona a la awm ngai loh thu a sawi.

CM Lalduhoma chuan, kum 1966-a Mizoram a buai khan Gorkha ṭhalai eng emaw zat Mizoram tan an rammut thu sawiin, "Dam leh tlang khatah, thih leh ruam khatah, tiin kan tuarin kan beiho a ni. Mizoram Gorkha unaute thusawi thinlunga chám reng ṭhin chu, 'Mizoram bâk lu nghahna hmun kan nei lo' tih hi a ni. Ram rorelnaah pawh District Council hun lai aṭang tawhin Gorkha-te'n hmun pawimawh tak an chang a ni," a ti.

Chief Minister hian Sainik School, Chhingchhip cadet zinga National Defence Academy & Naval Academy exam-a tling hmasa ber Agastya Thapa hnenah lawmpuina thuchei a hlan.

MGYA jubilee lawmna inkhawm Pratap Chhetri-a'n a kaihruai a, Central YMA president R Lalngheta, MGYA Central president Mahesh Rai leh vice president Nabin Thapa te pawhin thu an sawi.

Mizoram Gorkha Youth Association hi August 18, 1976-ah din a ni a, branch 17 an nei mek a ni.