Kawng siamtu thawk ṭha lote lakah legal action lak a nih dawn thu puang

Serchhip DC Paul L Khuma chuan nimin khan a pisaah thuthar thehdarhtute a kâwm a; Serchhip district-in kawngpui ṭha leh tlo an neih theih nan theihtawp chhuah a nih thu sawiin, kawng siamtu hna thawk ṭha lote leh, kawng enkawltu NHIDCL lakah a ṭul chuan legal action lak a nih tur thu a sawi.

Paul L Khuma chuan, kawng siamtu hna thawk ṭha lote lakah a ṭul dan azira legal action lak a nih theih nan Legal Team din a nih thu a sawi a, NH-02 siam mektu KRAM Infracon Pvt. Ltd. lakah District Administration an lawm lo tak zet tawh tih sawiin, "NHIDCL engineer-te enpuina hnuaia kawng siamna lung ṭha lo lutuk KRAM Infracon-in an hmang ṭhin leh DC Inspection Team leh MJA ten truck trip 5 lai an paihtir ngai khawpa a awm hi a thinrimthlak hle a ni," a ti.

Bawrhsap chuam, NH-02 siamtu KRAM Infracon leh anmahni ruaitu NHIDCL lakah legal action a ṭul chuan lak a nih dawn thu sawiin, "KRAM Infracon te hnathawh ṭha lo zarah NHIDCL pawhin an tawrh ve mai a ngai thei," a ti a; District Administration-in NH-02 kawng siam dan uluk taka an vil reng thu a sawi.

April 2025 aṭanga August 17, 2026 thlenga Serchhip district-a kawng siam District Administration-in an bawhzui dan sawiin Paul L Khuma chuan, an hmalakna hrang hrangah Serchhipa chanchinbumi te, Sub-Hqrs YMA leh Joint VC ten an ṭawiawmnaah an lawm thu a sawi a; Defect Liability Period tlem la awmah kawng siamtu contractor-te'n ṭha taka kawng an enkawl theih nan vilpui zel turin pawlte leh mipui a sáwm.

Serchhip Bawrhsap press conference-ah hian Mizorama NHIDCL hotu ber - executive director Adelbert Susngi, resident engineer Ram Niranjan Parsad leh field engineer Jiten Raut te, Kram Infracon general manager Ayush Tiwari te pawh an tel a ni.

PRESS CONFERENCE-A TARLAN

* Serchhip district-a chhunga NH-02 chu package thumah ṭhen a ni.

* Pakage-1, Phulmawi-Baktawng Mualkawi inkar km 5 chu Shivalaya Construction-in an siam a, an thawk ṭha thawkhat. May 25, 2024-ah kawng an siam zo a, an kawng siam 5% vel chu kumin fûrah thawm ṭhat a ngai a, ṭha takin an thawm ṭha zo tawh.

* Package-2, Baktawng Mualkawi - Keiṭum via Serchhip Bypass Road chu KRAM Infracon-in siamin, March 31, 2024-ah an ziam zo. An hnathawh a chhe hle a, an kawng siam zinga 80% aia tam mah kumin fûrah thawm ṭhat ngaiin a chhia a, lung an hman a ṭhat loh vangah ngaih a ni. March 31, 2028 thleng Defect Liability Period a ni a, hemi chhungin kawng chhe lai apiang an thawm ṭhat a ngai dawn.

* Phase-3, Keiṭum-Bungtlang inkar chu Bhartia Infra Projects Ltd.-in an siam a, an hna a ṭha thawkhat a, kumin fûrah thawm ṭhat ngai a la awm lo.