KHAWTHLIR

Mái chi sem

Adviser to chief minister TBC Lalvenchhunga chuan nimin khan a bial, Aizawl West-I chhunga Nûl Siam Association hnenah mái chi a sem. Aizawl West-I chhunga Sairang, Sairang Dinthar leh Sihhmui khuaah thlai hmun siama eizawng ṭhahnem tak an awm a, chung zingah chuan mai hmun siama eizawng pawh ṭhahnem tak an awm. Mai chi duhkhawp lei tur a awm loh ṭhin avangin MLA hian mi pakhat hnenah mai chì kg 4 zel a sem a ni.

Lawmpuina hlân

National Buyer - Seller Meet cum Exhibition (NBSM), 2026-a Best Seller Award dawngtu Lalniliani (Mesak Weaves), Mualṭhuam North hnenah Lunglei bawrhsap Navneet Mann chuan August 17, Thawhṭanni khan a pisaah lawmpuina a hlan. NBSM hi July 24-25, 2026 chhungin Shillong-ah neih a ni.

Ruihhlo donaa hmalakna sawiho

Nimin khan Saitual DC conference hall-ah District Joint Action Plan on Prevention of Drugs and Substance Abuse among Children and Illicit Trafficking Committee an ṭhukhawm. Saitual SDO (Civil) Tharun Patnaik-a'n a kaihruai a, a kaihhnawih sorkar department-te chu ruihhlo donaa hma an laknate leh thubuai ziah luh zatte August 21, 2026 hmaa thehlut tura tih an ni.

AIDS do sawiho

Serchhip District AIDS Prevention & Control Committee chu an chairman Paul L Khuma, bawrhsap kaihhruaiin nimin khan an ṭhukhawm. HIV/AIDS chungchanga Serchhip district dinhmun leh hmalaknate thlirho a ni a, HIV/AIDS darh zel tur ven nan chak lehzuala hmalak dan tur sawiho a ni.

MDTP hmalakna

Kolasib bawrhsap H Dolianbuaia hoin niin khan Mizoram District Transformation Programme (MDTP) hnuaia hna thawh mekte thlirho a ni. Kum 2025-26 ah MDTP hnuaia District Catalytical Intervention Plan hmalakna atan cheng nuai 90 ruahman a nih thu tarlan a ni a; hna thawhte a hmunah September 2026 thla laihâwlah endik a, hna awm zawng zawng October 2026 chhunga zawh vek ni se, an ti.

Hruizên pe

Lawngtlai District Disaster Management Authority chairman Donny Lalruatsanga chuan nimin khan Lawngtlai Chandmary, AOC Veng leh College Veng branch YLA-te hnenah hruizén metre 50-a sei pahnih ṭheuh a pe.

Kawng siam endik

Khawzawl additional DC K Zorammuana chuan August 17, Thawhṭanni khan kumin fûr laia NH-06 Seling leh Champhai inkar kawng chhe lai thawm ṭhat mek chu a enfiah. Additional DC hian NHIDCL leh contractor hotute chu ṭha tak leh chak zawka thawk turin a chah a ni.