Zobawka Health Clinic sak thar hawng

Health minister Lalrinpuii chuan August 17, Thawhṭanni khan Zobawk North Health Clinic Centre sak thar a hawng a; Zobawk South-a auditorium sak tur lungphùm a phúm bawk.

Zobawk North Health Clinic Centre hi ECRP-II sum nuai 22.5 sênga sak a ni a, Zobawk South auditorium tur chu Ministry of Tribal Affairs hnuaia Article 275 kaltlanga cheng nuai 470 sênga sak tur a ni.

Health Clinic Centre hawnnaah Lalrinpuii chuan, Centre chu a enkawlna sum awm sa a nih loh avangin sorkar leh mipui ṭanrualnaa enkawl a ṭul thu a sawi a, a chhiat a ṭhatah mawh la turin Zobawk North khawtlang a chah.

Lalrinpuii chuan, a MLA fund hmangin Health Clinic Centre-a thawk tur health worker rawih a nih dawn thu sawiin, "A panna kawng pawh siam ṭhat dan ngaihtuah vat a ni ang," a ti a; Lunglei Chief Medical Office-in damdawi leh hmanraw mamawhte a dah ang a, a enkawl zuina chu MLA fund aṭanga ngaihtuah a nih tur thu a sawi.

Zobawk North Health Clinic Centre sak thar hawnnaah hian Lunglei Municipal Council Ward-XI councillor Vanlalliana Pachuau, Lungleia Health department-a thawkte leh khawtlang hruaitute an tel a ni.

Zobawk South Auditorium sak tur lungphûm a phûmnaah Lalrinpuii chuan, auditorium sak tur chu Lunglei khawpui huam chhunga auditorium ṭha ber tur a nih thu a sawi a, "Lunglei khawpui pumpui tana hman theih tur a nih rualin, a chhawr ber turte chu Zobawk khawtlang an ni," a ti a; ṭha tak leh chak taka thawk turin contractor Excel Consultancy Services a hrilh a, ṭha taka vila en zui turin khawtlang hruaitute leh mipui a chah.

Lalrinpuii chuan, Zobawk South Health Sub-Centre chu fûr zawhah SASCI aṭangin sak ṭan beisei a nih thu te, Zobawk North-ah thiamthil zirna HDFC RSETI Training Centre sak a nih dawn thu te, Sawnngai-Nisapui inkara Agriculture Link Road laihna tur cheng vbc 200 fel a nih tawh a, fûr zawhah hna ṭan a nih tur thu te, Zobawka bazar shed sakna tur ruahman mek a nih thute a sawi bawk.