PTS-ah Excise basic training ṭan a ni

Nimin khan Police Training School (PTS), Thenzawlah Excise & Narcotics department-a direct recruitment hmanga lâk - inspector, sub-inspector leh constable te 'Basic Course Training' ṭan a ni a; PTS-a Police department pâwn lam mite tana basic training vawi khatna tur a ni.

Training hawn inkhawmah hian Excise & Narcotics secretary C Lalruaia chuan, professional training leh capacity building pawimawhzia a sawi a; IGP Meghna Yadav chuan, discipline, teamwork, integrity leh professional conduct te vawng tlat turin END-a thawk tharte a fuih a, "Uniformed service pahnihte thawh dunna tichak turin he training hi a pawimawh hle a ni," a ti.

Training hi PTS, Thenzawlah thla ruk chhung kalpui tur a ni a, END-a thawk tharte chu mi hmantlak, mahni invawng leh dikna ngaina mi an nih theih nan kaihhruai an ni ang.

PTS, Thenzawlah Police leh Excise hotute'n thingkung par chi pathum Thlado (Lagerstroemia speciosa), April Par (Delonix regia) leh Makpazangkang (Cassia javanica) te an phun a; hei hi Police department leh Excise & Narcotics department inkara thawhhona ṭhatzia entirna atana tih a ni.